Ema ho defisiénsia (EhD) sira bainhira partisipa iha workshop kona-bá sensibilizasaun Planu Nasionál ba Ema ho Defisiénsia ba Setór Edukasaun 2020-2024, iha salaun Infordepe, Balide, Dili, 01 Outubru 2020. Imajen António Gonçalves.

VIQUEQUE, 30 jullu 2021 (TATOLI)-Organizasaun la’ós governu-nian (ONG) Civiar  Network iha Timor-Leste (CNTL) identifika, involvimentu  ema ho difisiénsia sei kontinua menus asesu ba edukasaun formál iha munisípiu  Viqueque.

Diretóra CNTL, Norberta Vicenti, hatete ninia parte servisu oinsá bele elemina víolensia hasoru  ema ho difisiénsia, liuliu reforsa labarik no labarik feto ne’ebé ho kondisaun fízika difisiénsia sira iha Viqueque.

“Ita haree ba situsaun ema ho difisiénsia hanesan labarik no feto sira ne’ebé vulneravel liu ba violasaun hasoru ema difisiénsia sira, tanba mosu diskriminasaun oioin iha sira nian moris”, dehan nia ba Tatoli, sesta ne’e.

Nia hatutan diskriminasaun violasaun oioin ne’e, baibain akontese iha família, komunidade to’o iha sosiedade, ema difisiénsia  barak maka la asesu ba eskola.

“Ha’u hanoin diretór eskola sira iha Viqueque hatene númeru ema difisiénsia na’in hira maka asesu ba eskola”, Norberta Vicenti hatutan.

Norberta hatutan tan, dadus sensus husi tinan 2015 iha munisípiu Viqueque ema ho difisiénsia ema na’in-3000-resin, maibé númeru asesu ba edukasaun sura liman fuan.

“Ita lahatene loos difisiénsia sira ne’e agora iha ne’ebé, difisiénsia na’in ida rua maka hetan oportunidade  ba servisu no eskola formál. Ha’u mós Viqueque oan haree atividade barak maka ema ho difisiésia ninia partisipasaun sei menus tebes”, nia informa.

Iha fatin seluk adiministradór Munisípiu Viqueque, Januario ‘Bolly’, husu populasaun Viqueque labele viola ema ho difisiénsia sira tanba ema moris nu’udar umana  ninia valór hanesan.

“Ita ema umanu ne’e ninia valór moris hanesan, tanba ne’e ita la bele halo diskrimina hasoru ema difisiénsia sira, fó oportunidade hodi asesu ba saide de’it mak sira hakarak asesu ba”, nia akresenta.

Enkuantu  Diretór edukasaun munisípiu Viqueque, Emidio Amaral, dehan ema ho difisiénsia barak, maibé inan aman sira maka  moe lakohi lori ba asesu edukasaun formál.

“Ami lahalo deskriminasaun ba ema difisiénsia sira, tanba ami iha lista ema difisiénsia sira ne’ebé asesu ba eskola, iha postu Uatucarbau ema difisiénsia na’in-3, na’in-1 sestu anu no na’in-2 setimu anu, iha postu Viqueque Villa, eskola Ularik suku Bibileo, feto ho kursi roda (defisiénsia fízika) agora dadaun sestu (7) no iha eskola 01 Viqueque na’in-2 totál ema ho difisiénsia hamutuk na’in-6 maka asesu ba edukasaun”, nia relata.

Nune’e nia  husu ba autoridade lokál sira presiza kria sosializasaun  ba ema ho difisiénsia sira atu bele asesu edukasaun formál no tama iha anu letivu karik ema ho difisiénsia ba rejista naran iha eskola sira iha munisípiu Viqueque.

Jornalista       : Vitorino Lopes da Costa

Editór             : Cipriano Colo

HAKEREK NO HATÁN

Please enter your comment!
Please enter your name here