Prezidente Rotaract Club Dili, Elias de Jesus. Imajen/Espesiál.

DILI, 29 jullu 2021 (TATOLI)—Organizasaun voluntáriu Rotaract Club Dili apoia komunidade 1000-resin durante propagasaun surtu COVID-19 iha Dili.

“Durante ita-nia rai hasoru situasaun pandemia COVID-19 no serka sanitária, ami halo ona atividade hanesan fó apoiu ba ita-nia komunidade sira hamutuk 1000 iha Munisípiu Dili,” Prezidente Rotaract Club Dili, Elias de Jesus, informa ba Agência TATOLI, iha Care International, Bairru Pite, Dili, sesta ne’e.

Hosi númeru komunidade hirak ne’e lokaliza iha área Tasi-Tolu, Masin-Lidun, Hera, Ailok-Laran, mota Comoro, Manleuana to’o iha ponte CPLP.

Organizasaun voluntária Rotaract Club Dili realiza atividade umanitária ne’e tanba hetan fundu hosi Rotary International Dili.

Nia informa, atividade apoia umanitária ne’e Rotaract Clup Dili halo hamutuk ho Rotary International Dili, hodi sosa sasán ne’ebé komunidade sira presiza.

“Iha atividade ne’e ami ajuda Rotary International Dili, hanesan halo packing ba sasan sira hanesan roupa, fós, mina, masin, no sasán sira seluk ne’ebé komunidade sira presiza, tanba foin daudaun inundasaun ne’ebé akontese tán, entaun be’e mós sobu uma sira, ho nune’e uma barak hetan estragu no ema barak tebes mak lakon aihan no sira-nia roupa,” nia dehan.

Nune’e mós iha tinan 2020, Rotaract Clup Dili apoia mós ba komunidade sira-ne’ebé hela iha Becora, Camea, nomós membru Rotaract Clup Dili ne’ebé hela iha uma aluga tanba susar ba ai-han.

“Apoiu ai-haan ne’ebé ami fó mak nesesidade báziku hanesan fós, mina, masin no ami apoia ba membru Rotaract Clup Dili ne’ebé hela iha kost (uma aluga), tanba momentu iha serka sanitária ita labele halo viajen ba munisípiu sira, nune’e ami fó apoiu kedas ba sira,” nia hatutan.

Nia fó-sai katak, atividade apoia komunidade durante vijénsia COVID-19 ne’e iha oin rua, ida apoia nesesidade báziku no sasan ijiene nian.

Nune’e mós apoia nesesidade báziku hanesan fós, mina, masin, enkuantu apoiu sasan ijiene hanesan, miskitériu, sabaun, rinso, balde, basia nomós roupa.

Jornalista : Nelia Fernandes 

Editór       : Cancio Ximenes

HAKEREK NO HATÁN

Please enter your comment!
Please enter your name here