Imajen/Espesial.

OÉ-CUSSE, 29 jullu 2021 (TATOLI)-Autoridade Rejiaun Administrativa Espesiál Oé-Cusse Ambenu (RAEOA), liuhosi Sekretáriu Rejionál asuntu Agrikultura servisu hamutuk ho Sekretáriu Rejionál asuntu Administrasaun hatama ona rihun $2.900 ba kofre Estadu hosi rezultadu lelaun ba animál kapturadu hamutuk bibi 54 no karau rua.

Sekretáriu Rejionál Asuntu Agríkultura, José Eta, hatete atu regula no limite sirkulasaun animál sira iha área urbana, liuliu iha suku lima mak; Nipani, Costa, Lifau, Cunha ho Lalisuk partensia sub-rejiaun Pante Makasar Oé-Cusse, autoridade aplika dekretu lei tékniku pekuaria nian nú.12/2014 kona-ba retrisaun movimentu tráfiku animál iha área urbana, bandu ema atu labele husik animál la’o livre iha sidade laran.

Atu aplika dekretu lei animál ne’e, autoridade RAEOA liuhosi Sekretáriu Rejionál Agríkultura Departementu Pekuária no Veterinária, servisu hamutuk ho orden públika hosi Sekretáriu Rejionál Administarasaun halo opersaun durante fulan rua nia laran no konsege kaptura animál sira ne’ebé la’o livre iha área urbana hamutuk 139 (bibi 34, karau lima). Animál sira ne’e konsentra sira iha Sentru Produsaun Animál iha aldeia Maquelab, suku Taiboko, sub-rejiaun Pante Makasar,

Nune’e, nia dehan, tuir dekretu ne’e hatete autoridade fó tempu durante loron 10 ba animál na’in sira bele koopera atu hasai, liuhosi ne’e autoridade iha kompetensaun halo lelaun.

Maneira atu selu hasai animál maka na’in ba selu rasik iha banku, ho presu mak hanesan kada bibi ho fahi selu $50.00, ba karau selu $100.00 foti formuláriu iha Pekuáriu Agríkultura depois ba selu diretamente iha banku mak foin bele hasai animál.

“Durante loron 10 autoridade kontinua hein animál na’in sira laiha no lakoi koopera, entaun autoridade iha kompeténsia aplika lei tráfiku animál halo lelaun. Nune’e iha loron 8 jullu ita hasai aviza, ba públiku hahú lelaun, ho karta informativu Nú.186/RAEOA-ZEESM TL/SRAG/VII/2021 kona-ba lelaun animál, no konsege ema sosa ona bibi 54 ho karau rua, maibé ho kriteria sosa tenke hakiak iha foho ka dook hosi área urbana balu na’in duni mak hasai balu públiku, ho montante $2,900.00 hatama ona iha konta konta bankaria ZEESM iha BNU sukursál Oé-Cusse”, José Eta, ba Tatoli via telefonika, kinta ne’e.

Autoridade ne’e esplika, totál animál nebé kaptura husi ordem públiku iha área urbana hahú hosi loron 1-30 juñu hamutuk 138. Bibi hamutuk 134 no karau lima, maibé durante ne’e iha bibi 18 ho karau ida mak mate, nune’e daudaun ne’e animál sei iha hela Sentru Produsaun animál iha aldeia Maquelab, suku Taiboko, sub-rejiaun Pante Makasar hamutuk 64 kompostu hosi bibi 62 ho karau ida.

Antes ne’e, Sekretáriu Rejionál Asuntu Administrasaun, Martinho Abani Elo, hatete atu asegura meiu ambiente moos iha área urbana, Sekretáriu Administrasaun rekruta ona funsionário públiku na’in 10 atu destaka sira iha suku lima partensia sub-rejiaun Pante Makasar atu observa movimentu animál, nune’e garante sidade Oé-Cusse matak no buras

“Oé-Cusse dezenvolvimentu ZEESM iha ona, ita hare kapaas tanba ahi lakan oras 24 nia laran, estrada di’ak, nune’e ita mós persiza hamatak liutan, sidade sai furak, animál tenke dook hosi vila ka sulan iha luhan. Ami bandu lei mos la fó autoriza ema atu husik animál iha área urbana”, nia dehan.

Jornalista       : Abilio Elo Nini

Editór             : Cancio Ximenes

HAKEREK NO HATÁN

Please enter your comment!
Please enter your name here