Sentru Integradu Jestaun Kriza (SIJK) kontinua atende komunidade ne’ebé hakarak halo teste swab, tersa (27/07/21). Imajen Tatoli/António Gonçalves.

DILI, 28 jullu 2021 (TATOLI)—Sala Situasaun, Sentru Integradu Jestaun Krize (SIJK) rejista kazu pozitivu 148, rekoperadu 66 no kazu ativu 736.

“Kazu foun 148 hosi Dili 18 no Munisípiu Ermera 123 no munisípiu seluk hamutuk hitu, kompostu hosi mane 68 no feto 80,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, kuarta ne’e.

Notísia relevante:COVID-19, rekoperadu 33 no ativu 654

Hosi totál kazu detetadu foun ohin, ho idade 12 mai karaik na’in-tolu, entre tinan 12-59 na’in 142 (96%), idade 60 mai karaik  na’in-neen, númeru ne’e 49 ka 33,1 % sintomátiku.

Kumulativu kazu konfirmadu sura hosi 21 marsu 2020 to’o 28 jullu 2021 hamutuk 10.535. Hosi horisehik mai ohin, teste ne’ebé Laboratóriu Nasionál Saúde halo hamutuk 961 PCR, ho detallu hanesan tuir-mai, Vijilánsia sentinela 56, rastreiu ba kontaktu ka Contact tracing 458, Rastreiu Aleatóriu ka Random Screening nain na’in-rua, viájen sai-hosi serka sanitária hosi Dili 387, viájen internasionál  28, Follow up iha kuarentena na’in 30.

Totál testes PCR ne’ebé halo horisehik 27 jullu iha Munisípiu-sira seluk, RAEOA no HNGV hamutuk 276 ho detalla hanesan tuir-mai, Maubisse 89, Maliana 13 Viqueque hitu, Suai lima, Baucau 102, Ermera haat RAEOA hitu no HNGV 49.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 28  jullu tuir sistema informasaun Sáude iha Ministériu Saúde, totál  kumulativu 1ª doze iha Dili 133.016 (62,2%) no  totál  kumulativu 2ª doze  iha Dili 75.889 (35,50%).

Ema ne’ebé simu ona vasina doze dahuluk iha Timor Leste 277.953 (36,8%) no simu ona doze daruak  89.286 (11,83%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 3,6/100 mil abitante, enkuantu ba deit Munisípiu ERMERA 18,8/100 mil abitantes. Iha semana ida ne’e, insidénsia iha Munisípiu Dili tu’un ba 4,3/100 mil abitantes, tuir kedan ho Munisípiu Viqueque ho valor 2,0/100 mil abitantes.

Ida-ne’e, hatudu katak, insidénsia Munisipiu Ermera nian maka a’as-liu entaun  Munisípiu tolu – Ermera, Dili, Viqueque – maka iha risku bo’ot liu atu populasaun hetan da’et, no hada’et tutan virus SARS-CoV-2, iha komunidade nia le’et. Ba de’it munisípiu Díli 6,2/100 mil abitante.

Informasaun hosi izolamentu

Iha 28 jullu 2021, izolamentu Vera Cruz halo tratamentu ba kazu detetadu na’in 18, iha área obstetrisia na’in-hitu, no iha medisina interna na’in-hitu  iha sirurjia na’in-tolu, Pediatria na’in-ida. Iha obstetrisia na’in-hitu kategoria leve (mild) hotu. Iha área medisina interna na’in-hitu. Tolu grave, ida uza ventiladór, rua ho oksijéniu, na’in-rua leve mild hotu. Sira na’in-tolu iha sirurjia kategoria leve mild hotu no ida iha pediatria kategoria leve.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Apelu

Apela ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira-ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here