Konselleiru Másimu Partidu KHUNTO konversa ho membru PNTL munisípiu Lautém, molok tuir julgamentu iha TDB, tersa (27/07), iha Villa nova, Baucau. Imajen TATOLI/Natalino Belo

BAUCAU, 27 jullu 2021 (TATOLI)–Tribunál Distritál Baucau (TDB), iha tersa ne’e, hahú halo julgamentu ba Konselleiru Másimu Partidu Kmanek Haburas Unidade Nasionál Timor-oan (KHUNTO), Jose dos Santos ‘Naimori Bukar’, relasiona ho dezentendimentu ho parte Polísia Nasionál Timor-Leste (PNTL), iha loron 02 maiu 2018 maizumenus tuku 19:00 to’o 20:00, iha munisípiu Lautém.

Naimori Bukar no ninia komitiva to’o iha TDB, Villa nova iha tuku 14:14 no diretamente tama ba areadór Tribunál hodi hein tempu atu halo julgamentu, no ikus mai prosesu julgamentu hahú tuku 15:15 no ramata iha tuku 16:30.

Notísia relevante: TDB adia julgamentu kazu JdSNB

Tuir akuzasaun hosi Ministériu públiku (MP), Naimori Bukar hamutuk ho militante Partidu Aliansa Maioria Parlamentar (AMP), ne’ebé momentu ne’ebá kompostu hosi CNRT, PLP no KHUNTO, tuir dalan konvoi kareta ho destinasaun hosi área Foiluro atu ba fatin deskansa tanba tuir ajenda, iha loron 03 marsu iha kampaña pre-eleitorál iha munisípiu Lautém.

Maibé, tanba razaun oras ne’ebé kampaña ramata iha tuku 17:00, maka parte seguransa PNTL hapara no fó hanoin atu labele iha tan konvoi tanba kestaun seguransa.

Iha momentu ne’ebá mosu dezentendimentu oituan, maibé hafoin ne’e konvoi ne’ebé lideradu hosi Naimori Bukar diretamente liu ba Lospalos villa atu deskansa.

Nune’e, MP reprezenta hosi Bartolomeu de Araújo, iha julgamentu hateten, prosesu rejistadu ho númeru 0039/19, akuza Naimori Bukar hanesan Arguidu ba krime ‘obstrusaun ba autoridade públika’, ne’ebé previstu iha artigu 243 kódigu penál, tanba akontesementu ne’e mosu dezentendimentu entre parte rua, ne’ebé ekipa Naimori Bukar akuza katak membru Polísia la servisu ho profisionál no afilia ba partidu seluk.

Durante julgamentu, Tribunál lee akuzasaun no Arguidu iha direitu no obrigasaun atu defende-an katak akuzasaun hosi MP balun loos no balun la loos, inklui rona mós sasin na’in-rua hosi membru PNTL munisípiu Lautém, ne’ebé hateten laiha problema privadu ruma entre Naimori Bukar no membru PNTL molok no hafoin akontesimentu.

Tuir provas ne’ebé mak iha, MP husu ba Tribunál koletiva ne’ebé julga prosesu ne’e atubele deside tuir kompeténsia.

Enkuantu, hosi parte Advogadu Privadu hosi Arguidu ne’ebé reprezenta hosi Ismael Assunção Lopes, hateten iha duni prova relasiona ho akuzasaun hosi MP ne’ebé nu’udar na’in ba kazu, maibé iha akuzasaun balun konsidera laloos tuir sasin na’in-rua ne’ebé hato’o ona durante julgamentu inklui Arguidu nia deklarasaun.

Ismail hateten, tesmuña rasik ohin deklara iha Tribunál katak iha duni dezentendimentu, maibé la’ós direta hala’o hosi Naimori Bukar, maibé hosi eis Deputada balun, ne’ebé Naimori rasik laiha liafuan ruma atu hamosu dezentendimentu.

Advogadu Privadu husu Tribunál absolve desizaun

Nune’e, parte Advogadu Privadu husu ba Tribunál atu absolve desizaun hasoru Arguidu, tuir akuzasaun hosi MP, tamba iha artigu 243 Kódigu Penál kona-ba obstrusaun ba autoridade públika, iha elementu rua mak presiza atu haree hanesan violénsia no ameasa grave.

Maibé, durante julgamentu laiha evidénsia ne’ebé hatudu katak Arguidu komete krime públiku ba ameasa no violénsia grave, maka parte Advogadu Privadu husu atu Tribunál koletiva foti desizaun atu absolve Arguidu hosi akuzasaun MP.

“Parte Defeza solisita ba Tribunál koletiva ida-ne’e tanba laiha ameasa no laiha violénsia grave, husu atu Tribunál absolve Arguidu iha prosesu ida-ne’e,” Ismael hateten iha TDB.

Tuir Defensór, kuandu haree ba obstrusaun ba autoridade públika ne’ebé previstu iha artigu 243 Kódigu Penál, iha nia gravidade ka lae hanesan violénsia no amaesa grave ba autoridade públika.

Entretantu, iha Kódigu Penál Kapítulu V Kontra Autoridade Públika, ne’ebé iha artigu 243, haktuur katak sé mak liuhosi violénsia ka ameasa maka’as kontra funsionáriu ka ema hosi forsa militár, militarizadu ka polisiál sira, bainhira opoin ba prátika asaun ka’it ho ezersísiu ninia funsaun ka bandu ba prátika asaun kontráriu ba ninia devér sira, sei kondena ho pena prizaun husi tinan 2 to’o 6.

Iha pontu rua, bainhira asaun ne’ebé temi tiha iha númeru anteriór prátika efetivu ka bandu atu prátika maka sei kastigu ho pena tinan 2 to’o 8.

Leitura akordaun realiza loron 16 setembru

Nune’e, hafoin rona deklarasaun hosi MP, Arguidu, Defeza no Sasin, tuir lei, Tribunál iha másimu loron 15 atu foti desizaun, maibe tanba razaun feriadu judisiál, entaun Tribunál deside atu halo leitura akordaun ba arguidu iha loron 16 setembru 2021 tuku 10:00 dadeer.

Entretantu, julgamentu ne’e prezide hosi Juíz kolektiva, kompostu hosi José Escurial, Maria Modesta, Sribuana da Costa no MP reprezenta hosi Bartolomeu de Araújo, enkuantu Advogadu privadu mak Ismael Assunção Lopes no Arnaldo da Costa Lopes.

Antes ne’e, TDB hato’o karta levantamentu imunidade ba Arguidu tanba hanesan membru  Konsellu Estadu, nune’e bele hatan ba prosesu iha Tribunál.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here