Edifísiu Sentru Saúde Maliana. Imajen Tatoli/Sérgio da Cruz.

BOBONARO, 27 jullu 2021 (TATOLI)—Pesoál importante iha Diresaun Munsipál Konservatóriu Serbisu Rejistu Notariadu (DMCSRN sígla portugés), munisípiu Bobonaro ho inisial JMP detetadu pozitivu COVID-19, iha tersa (27/07).

“Pesoál saúde-sira lori ona JMP ba izolamente otél Ramaskora no ninia kaben ho oan na’in-rua negative,” Diretór Serbisu Saúde Munisípiu Bobonaro, João Barreto Cardoso, hateten ba jornalista Agência Tatoli via telefónika, tersa ne’e.

Notísia relevante:COVID-19, rekoperadu 33 no ativu 654

Pesoál saúde-sira mós halo ona dezinfekta ba rezidénsia JMP  atu bele prevene virus labele hada’et ba família, inklui komunidade ne’ebe hela besik.

Informasaun ne’ebé Agência Tatoli asesu, JMP halo viajen ba Dili iha kinta 22 jullu uza motór privada, to’o iha Dili JMP hamutuk ho kolega ida uza karreta hodi sirkula iha Dili laran, maibé la halo kontaktu ho ema seluk no iha 23 julu lorokraik fila kedan mai Maliana.

Iha Maliana  JMP halo de’it kontaktu ho família, no iha 26 jullu JMP rasik husu ba parte Serbisu Saúde munisípiu Bobonaro atu halo teste swab ba funsionáriu hotu-hotu, maibé na’in-hitu de’it mak partisipa, ho rezultadu amostra ne’e na’in-ida mak detetadu pozitivu COVID-19.

“Nia mak husu duni ami atu halo teste swab tanba iha fatin ne’ebé nia serbisu ba, iha funsionáriu na’in-ida pozitivu COVID-19 iha 23 jullu, agora kumpre ona izolamentu iha Tasi-tolu. Tanba ne’e, ami-nia pesoál saúde ba halo Contact tracking ikus mai pozitivu duni,” diretór ne’e esplika.

Hafoin rona rezultadu ne’e, Diretór Nasionál Konservatóriu Serbisu Rejistu Notariadu, orienta kedan hahú hosi 27 mjullu suspende provizóriu atividade atendimentu públiku no sei loke fali iha 05 agostu, bainhira funsionáriu hirak-ne’e rekopera saúde.

Populasaun Bobonaro ne’ebé presija urjente atu trata dokumentu hanesan, Pasaporte no Billete Identidade, tenki  ba foti númeru kontaktu iha kuadru avizu DMCSRN, Holsa, Maliana, nune’e funsionáriu-sira bele fasilita.

Kona-bá tratamentu sertidaun RDTL, sertidaun kazamentu no rejistu Kriminál, funsionáriu-sira sei la atende, tanba ema importante atu asina dokumentu ne’e kumpre hela izolamentu.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here