Funsionáriu TATOLI, I.P partisipa misa agradesimentu hodi selebra aniversáriu Agência TATOLI, I.P nian ba-dala V iha Kapela Aimutin, Dili, tersa (27/07). Imajen Tatoli/Francisco Sony

DILI, 27 jullu 2021 (TATOLI)-Agência Notisioza Timor-Leste  TATOLI, I.P, tersa ne’e, selebra nia aniversáriu ba dalima; 27 jullu 2016-27 jullu 2021.

Selebrasaun aniversáriu ajénsia ofisiál Estadu Timor-Leste nian ne’e  liuhosi misa agradesimentu   ne’ebé prezide hosi Padre Bento Barros Pereira, iha Igreja privizoriu Aimutin, Dili, ne’ebé partisipa hosi membru konsellu diretiva, inklui jornalista ho funsionáriu sira hotu ne’ebé hala’o knar iha Agência TATOLI, I.P.   

Agência TATOLI.IP nu’udar ajénsia ofisiál estadu Timor-Leste nian. Ezisténsia Agência TATOLI.IP maihosi inisiativa Governu liuhosi Sekretáriu Estadu Komunikasaun Sosiál (SEKOMS) iha 2012-

TATOLI.IP nu’udar transformasaun hosi ETNA (East Timor News Agency)́ depois nakfila ba ANTIL (Ajénsia Notisioza Timor-Leste). Ajénsia estadu ne’e hetan aprovasaun iha Konsellu-Ministru no públika iha Jornál Repúblika iha loron 14 marsu 2016, nu’udar embriaun ho naran ANTIL.

ANTIL lansa hosi Primeiru-Ministru, Rui Maria de Araújo, iha loron 27 jullu 2016. Iha marsu 2017, Konsellu-Ministru aprova ANTIL sai TATOLI, nu’udar ajénsia ofisiál Estadu Timor-Leste nian no publika iha Jornál Repúblika. TATOLI ho nia estatutu rasik nu’udar Institutu Públiku (IP).

Objetivu primeiru estabelese ajénsia estadu Timor-Leste mak sai fonte informasaun ofisiál Estadu sira Timor-Leste ne’ebé́ iha kapasidade no kbiit elabora produtu informasaun no notísia ne’ebé nesesita hosi públiku utilizadór informasaun iha eskalaun nasionál, rejionál no internasionál.

Segundu mak nu’udar implementadór Konstituisaun ne’ebé sai devér Governu nian atu fornese informasaun  kredivel no loos ho mós sai direitu informasaun sosiedade Timor- Leste ne’ebé́ garantidu husi artigu 40o no 41o konstituisaun Timor-Leste nian.

Agência TATOLI, I.P la’ós de’it sai produtór informasaun maibé mós iha papél nu’udar “National information clearing house” (Uma-mahon ba fó-sai informasaun nasionál ho loloos): Iha tarefa fó klarifikasaun no informasaun serteza, halakon misinformasaun (informasaun sala) no desinformasaun (informasaun ne’ebé kontradís ho verdade).

Padre Bento Baros, diriji misa agradesimentu hodi komemora aniversáriu Ajénsia TATOLI,I.P nian ba-dala V iha Igreja provizoriu  Aimutin, Dili, tersa (27/07). Imajen Tatoli/Francisco Sony

Iha selebrasaun misa agradesimentu ne’e, Amu selebrante Bento Barros Pereira hateten, Tatoli nu’udar naran ida ne’ebé ninia karakter fundamentu iha evanjellu,  São Marcos, kapítulu 16, versíkulu 14-20 ne’ebé Jesus Kristu haruka hotu atu ba Tatoli lia-fuan di’ak ka lia ksolok ba mundu tomak, liuhosi lia-fuan no hahalok ne’ebé bele fó moris ba ema.

“Lia-fuan sira ne’e kle’an bainhira ita deskobre ita-nia aan ita bele komprende mós ba ita-nia kontestu komunikasaun jornalizmu nian, servisu sira ne’ebé mak ita oferese ba ema, la’ós lia-fuan halo ema kontente ka la kontente, maibé liuliu oinsá atu soi ema,” Amu Bento Barros Pereira hateten liuhosi nia omilia.

Nia dehan, Tatoli nu’udár Agência, tenke  Tatoli ka haklaken lia-fuan liuhosi, hahalok tenke halo ema sira hetan maksoin liuliu ema Timor bele hetan maksoin iha sira-nia moris.

Bainhira komprende karakter sira ne’e, bele aplika konkretamente iha mundu komunikasaun jornalizmu nian hodi serve povu ka sosiedade Timor nian, ho informasaun tomak ne’ebé mak oferese ka fahe lori di’ak ba ema la’ós buka ema atu gaba dehan Tatoli númeru uluk, maibé oinsá oferese informasaun ne’ebé di’ak.

“Ezisténsia Agência TATOLI maske sei hasoru dezafiu barak maibé la’o hamutuk nafatin nu’udár família entre ita-ema liuliu entre ita-sira ne’ebé mak hala’o knaar iha Tatoli, tenke presta servisu ba ema-nia di’ak no buat tomak ne’ebé ita halo tenke moris uluk mak foin fó ba sosiedade ne’ebé ita serví,” nia hateten.

Obstákulu sira ne’ebé Tatoli hasoru, amu Bento tenik, la’o hamutuk nafatin ho Maromak hodi bele ultrapasa frakeza, difikuldade ne’ebé iha hanesan nu’udár povu Israel maske hasoru difikuldade maibé hamutuk ho Maromak hodi bele ultrapasa.

Biban ne’e, Prezidente Konsellu Diretivu Agência TATOLI, I.P, Manuel Pinto, hato’o agradese ua’in ba  funsionáriu TATOLI, I.P tomak tanba TATOLI to’o mai ohin loron hotu-hotu nia kontribuisaun ne’ebé  nunka hakiduk atu kontribui ba objetivu komún ne’ebé deside ona iha misaun TATOLI nian.

“Ha’u nafatin atu ita kontinua ho espíritu, hanoin di’ak tomak ne’ebé daudaun iha, kontinua ba oin,” nia hateten.

Prezidente KOnsellu Diretivu TATOLI, I.P, Manuel Pinto. Imajen Tatoli/Egas

Iha aniversáriu TATOLI ba da-lima ne’e, Manuel Pinto, husu nafatin funsionáriu TATOLI haklaken nafatin lia-fuan ne’ebé di’ak   atu soi ema.

“Tanba ba públiku bem estár komún nian, ita asume responsabilidade ida ne’ebé mak importante, entaun iha área komunikasaun jornalizmu nian ita tenke kontinua haklaken atu soi ema, ita labele haklaken mensajen ne’ebé mak atu haterus ema ka lori susar oioin ba ema, ida ne’e tau iha ita-nia hanoin nu’udar baze ida ba loron aban nian,” Manuela Pinto hateten.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here