BOBONARO, 26 jullu 2021 (TATOLI)—Ministru Asuntu Parlamentár no Komunikasaun Sosiál (MAPKOMS), sosializa instalasaun sistema dijitalizasaun, Rádiu Televizasaun Timor-Leste, Empreza Públika (RTTL,E.P), iha postu administrativu Cailaco, munisípiu Bobonaro.
Ministru, Francisco Jeronimo, hateten progranma instalasaun sistema ne’e, atu diversifika RTTL,E.P hosi sistema analog muda ba dijitál, hodi apár ho situasaun mundu nian.
Notísia relevante:Tinan ne’e MAPKOMS instala torre RTTL,E.P iha Tapo
“Ha’u mai Cailaco atu esplika lala’ok dijitalizasaun ba xefe suku no komunidade atu labele dúvida bainhira tékniku-sira mai halo instalasaun,” Francisco Jeronimo hateten iha salaun administrasaun Cailaco, segunda ne’e.
Razaun halo uluk sosializasaun iha postu administrativu Cailaco, tanba bazeia ba estudu ne’ebé tékniku-sira halo, frekuénsia hosi torre ne’ebé harii iha Kutulau, munisipiu Liquiça konsege transmite to’o iha Cailaco.
Sosializasaun hotu tékniku-sira sei tun direta atu foti dadus uma-ka’in, hodi halo instalasaun ba komunidade ne’ebé asesu ona televizasaun, iha edifísiu públiku-sira hanesan sede suku atu komunidade ne’ebé laiha televizaun bele asesu.
Instalasaun dijitál ne’e sei monta gratuita ba komunidade ne’ebé iha ona televizaun, no antena ne’ebé Governu sei distribui ba komunidade ho kanál informasaun hamutuk 22, hosi nasaun dezenvolvidu-sira, nune’e bele asesu informasaun rai-laran no rai-liur.
“Sistema dijitalizasaun ne’e, sei fó vantájen ba komunidade no la presija sosa tán parabola,” Ministru ne’e subliña.
Iha fatin hanesan Prezidente Autoridade munisípiu Bobonaro, Ernesto de Oliveira Barreto, agradese ba Governu, ne’ebé prioritiza populasaun Cailaco iha programa instalasaun sistema dijitál ne’e, tanba durante ne’e populasaun barak mak la asesu RTTL,E.P.
Xefe suku Manapa, Jeferino Loco-Bere rekoñese, durante ne’e populasaun barak mak seidauk asesu kanál RTTL,E.P, tanba balun hela iha área remota ne’eb’e iha tempu udan difikulta asesu informasaun kona-bá situasaun rai-laran.
Autoridade lokál ne’e mós aprezenta katak, populaun Cailaco, iha aldeia barak mak seidauk asesu eletrisidde, tanba ne’e iha instalasaun sistema dijitalazaun ne’e komunidade barak mak sei kontinua la asesu.
Postu administrativu Cailaco, iha Suku ualu mak hanesan, Manapa, Da-udu, Purugua, Atudara, Goulolo, Meligo, Raiheu no Genulai ho totál populasaun 10.405 kompostu hosi mane 5.257 no feto 5.148.
Bazeia ba akordu kooperasaun entre Governu Timor-Leste ho Governu Xina, iha tinan ne’e sei oferese set box receiver rihun 30 no antena hodi distribui ba populasaun ne’ebé seidauk asesu RTTL,E.P iha área rurál.
Jornalista: Sérgio da Cruz
Editór: Cipriano Colo
