Pesoál Saúde Vasina AstraZeneca doze daruak ba komunidade sira. Iha Postu Administrativu Dom Aleixo, Suku Bairro- Pite, kuarta (21/07). Imajen Tatoli/Francisco Sony

DILI, 26 jullu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu pozitivu neen rekoperadu, 45 no kazu ativu 656.

“Kazu foun neen hosi Dili rua no Munisípiu-sira seluk na’in haat, ne’ebé kompostu hosi mane na’in-haat no feto rua,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, segunda ne’e.

Notísia relevante:COVID-19, rekoperadu 45 no ativu 726

Hosi totál kazu detetadu foun ohin, ho idade 12 mai karaik laiha, entre tinan 12-59 na’in lima (94,4%), idade 60 mai karaik  na’in-ida.

Kumulativu kazu konfirmadu sura hosi 21 marsu 2020 to’o 26 jullu 2021 hamutuk 10.354. Hosi horisehik mai ohin, teste ne’ebé Laboratóriu Nasionál Saúde halo hamutuk 262 PCR, ho detallu hanesan tuir-mai, Vijilánsia sentinela laiha, rastreiu ba kontaktu ka Contact tracing lima, Rastreiu Aleatóriu ka Random Screening na’in-tolu, Viájen sai-hosi serka sanitária hosi Dili 161, Viájen internasionál  neen, Follow up iha kuarentena na’in 87.

Totál testes PCR ne’ebé halo iha 25 jullu iha Munisípiu-sira seluk, RAEOA no HNGV hamutuk 103 ho  detalla hanesan tuir-mai, Maubisse 11, Maliana ualu, Viqueque rua, Suai sia, Baucau 25, Ermera rua, RAEOA laiha no HNGV 19.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 26  jullu tuir sistema informasaun Sáude iha Ministériu Saúde  ho totál  kumulativu 1ª doze iha Dili 129.228 (60,4%) no totál  kumulativu 2ª doze  iha Dili 67.573 (31,6%).

Ema ne’ebé simu ona vasina doze dahuluk iha Timor-Leste 267.673 (35,4%) no simu ona doze daruak 80.677 (10,6%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 2,3/100 mil abitante, enkuantu ba de’it munisípiu Díli 4,8/100 mil abitante.

Insidénsia iha leten sei nafatin hatudu katak, Munisípiu Dili maka fatin ho risku bo’ot liu atu populasaun hetan da’et no hada’et tutuan virus SARS-CoV-2.

Informasaun hosi izolamentu

Iha 26 jullu 2021, izolamentu Vera Cruz halo tratamentu ba kazu detetadu na’in 17, iha área obstetrisia na’in-neen, no iha medisina interna na’in-hitu  iha sirurjia na’in-tolu, Pediatria na’in-ida. Iha obstetrisia na’in-tolu kategoria leve (mild) hotu.

Iha área medisina interna na’in-hitu. Rua grave, ida uza ventiladór, ida ho oksijéniu, na’in-tolu moderadu, na’in-rua leve mild hotu. Sira na’in-tolu iha sirurjia kategoria leve mild hotu no ida iha pediatria kategoria leve.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Apelu

Apela ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona, atu prevene moras COVID-19 da’et ba mai.

Regra sira-ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here