Xefe Departamentu Planeamentu SRESS, Cancio Coa. Imajen Tatoli/Abilio Elo Nini.

OÉ-CUSSE, 26 Jullu 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretáriu Rejionál Asuntu Edukasaun no Solidariedade Sosiál (SRESS) aloka millaun $1,5 hosi Orsamentu Jerál Estadu (OJE) 2021 atu hadi’a Eskola Bázika Filiál neen (6) iha tinan ne’e

“Tinan ne’e, hosi Sekretáriu Rejionál Asuntu Edukasaun no Solidariedade Sosiál (SRESS) hakarak hadi’a eskola ne’ebé mak kondisaun grave tebes hamutuk neen (6). Daudaun ne’e, ninia prosesu iha ona aprovizionamentu no hein atu ba faze tenderizasaun. Orsamentu atu hadi’a eskola hirak ne’e hamutuk millaun $1,5,” Xefe Departamentu Planeamentu SRESS, Cancio Coa, informa ba Agênsia Tatoli iha nia knaar fatin, Santa Rosa, Pante Makasar, Oé-Cusse, segunda ne’e

Aliende ne’e, nia informa, iha planu seluk no iha tinan ida-ne’e RAEOA konstrui tán eskola foun hamutuk 13 ne’ebé halo ona tenderizasaun iha fulan jullu nia laran no hein de’it ba faze públikasaun ninian.

Entretantu Sekretária Rejionál Asuntu Edukasaun Solidariedade Sosiál, Avelina da Costa, hateten dezastre naturál siklone tropikál seroja ne’ebé akontese iha 4 abríl liubá ne’e estraga eskola barak, tanba ne’e mak SRESS planea atu halo manutensaun ba eskola hirak ne’e. 

Sekretária Rejionál Asuntu Edukasaun Solidariedade Sosiál, Avelina da Costa. Imajen Tatoli/Abilio Elo Nini.

“Osan aprova ona. Ninia prosesu tama ona iha aprovizionamentu no espera katak iha fulan agostu nia laran ne’e prosesu ramata, bele tama ona iha faze tenderizasaun. Tanba osan ne’e inklui mós kompleta sosa mobiliáriu sira hanesan meja, kadeira, nune’e fasilita eskola sira no materia didátiku ba labarik pre-éskolár no ekipamentu hodi fasilita merenda eskolár,” nia dehan.

Eskola Bázika Filiál (EBF) neen (6) ne’ebé mak atu halo manutensaun mak EBF Aijao-Fukan iha suku Abani, sub-rejiaun Pasabe, EBF Bona iha suku Uis-Taco, sub-rejiaun Nitibe, EBF Oénunu iha suku Suni-Ufe, sub-rejiaun Nitibe, EBF Roti iha suku Cunha, sub-rejiaun Pante Makasar, EBF Bimano iha suku Taiboko, sub-rejiaun Pante Makasar no EBF Afo-Neno iha suku Costa, sub-rejiaun Pante Makasar.

Jornalista : Abilio Elo Nini

Editór     : Cancio Ximenes

HAKEREK NO HATÁN

Please enter your comment!
Please enter your name here