Postu Saúde Luga-Asa. Imajen Tatoli/Vitorino Lopes da Costa

VIQUEQUE, 25 jullu 2021 (TATOLI)- Enfermeiru Postu saúde Luga-Asa, António Gusmão relata, inísiu  janeiru to’o mai juñu 2021, postu saúde Luga-Asa rejista pasiente moras infesaun respiratóriu  alta hamutuk na’in-682.

“Ami rejistu pasiente moras IRA maka domina iha ami nia postu saúde,” António Gusmão, informa  ba Agência Tatoli iha Postu Luga-Asa, Suku Uma Uain Leten, Viqueque, sábadu (24/07).

Enfermeiru Postu saúde Luga-Asa, António Gusmão. Imajen Tatoli/Vitorino Lopes da Costa

António  hateten, kada loron pesoál saúde sira halo atendimentu ba pasiente sira ema na’in-20-resin ne’ebé iha suku Uma Uain Leten no Suku Makadique. Maibé populasaun sira mai halo tratamentu tenke uza máskara maka foin fó tratamentu.

Populasaun  hosi Uma Uain Leten maioria maka asesu mai postu saúde Luga-Asa hodi  halo tratamentu. Enkuantu moras ne’ebé postu saúde Luga-Asa rejista moras IRA  kada fulan mak hanesan  hosi   janeiru  rejista hamutuk 153,  fevereiru na’in-163, marsu  na’in-84, abríl na’in-53, Maiu na’in-80 no juñu na’in-150 ho totál  pasiente na’in-682.

Iha fatin seluk, Xefe Suku Uma Uain Leten, Martino Soares Gusmão relata, populasaun hosi Suku Uma Uain Leten, Postu Administrativu Viqueque Villa nian  maioria maka asesu ba fasilidade saúde ne’ebé iha postu saúde Luga-Asa no maioria populasaun Uma Uain Leten simu hotu ona vasina.

Dadus   vasina AstraZeneca  provizóriu husi  Munisípiu Viqueque hanesan  ema idade tinan-60 ne’ebé simu ona vasina hamutuk na’in-697,  funsionáriu na’in-698, liña frente na’in-2730, idade hosi tinan 18-59 hamutuk na’in-955 no idade tinan 18-59 na’in-8948. Ema ho idade tinan-60 hamutuk na’in-2.697  maka simu ona vasina AstraZeneca,

Laiha Parteira  atende inan-isin rua

Biban ne’e, António Gusmão, informa, postu saúde Luga-Asa laiha parteira ida hodi fó konsulta no partu ba inan-isin rua sira.

“Uluk iha tinan 2011 mai leten ne’e Postu Saúde Luga-Asa iha parteira, maibé   parteira ne’e ba fali internamentu Viqueque. Tanba ne’e iha Postu Saúde Luga-Asa laiha parteira hodi fó konsulta no partu ba inan isin-rua sira,” António Gusmão hateten.

“Bainhira inan isin-rua atu partu, sira sempre mai bolu ami médiku no enfermeiru sira. Depois ami bá ajuda inan isin-rua partu  ne’e, iha sira-nia uma rasik. Partu hotu ami fó kedas tratamentu ka imunizasaun.   Tanba postu ne’e laiha fasilidade hodi  fó partu  ba inan isin-rua sira,” nia tenik.

Pesoál saúde servisu iha Postu saúde Luga-Asa, kompostu hosi enfermeiru na’in-ida, doutór na’in-ida, enfermeiru voluntáriu na’in-ida, voluntáriu saúde públiku  na’in-ida hodi fó atendimentu populasaun hamutuk na’in-1.689.

Tuir demografia hosi  Postu Saúde Viqueque Villa  kompostu husi jestór na’in-ida, médiku na’in-tolu, enfermeiru na’in-17, parteira na’in-tolu, enfermeiru dentária na’in-ida, tékniku laboratóriu na’in-ida, tékniku farmásia na’in-ida, nutrisaun na’in-ida, tékniku RAD na’in-ida, sanitáriu na’in-ida, administrasaun na’in-ida, Oftalmolojia na’in-ida, asistente enfermaria na’in-ida,  motorista na’in-ida, pesoál sanitáriu na’in-ida ho totál pesoál saúde na’in-35.

Jornalista       : Vitorino Lopes da Costa

Editór             :  Francisco Simões

HAKEREK NO HATÁN

Please enter your comment!
Please enter your name here