Prezidente Konsellu Veteranu, Vidal de Jesus "Riak Leman". Imajen TATOLI/Arminda Fonseca.

DILI, 24 jullu 2021 (TATOLI)Governu liuhosi Ministériu Asuntu Kombatente Libertasaun Nasionál (MAKLN), sesta ne’e, inaugura ona uma ba veteranu Agostinho Sarmento ‘Mau Tino’ iha postu administrativu Same, munisípiu Manufahi.

“Ministru Júlio Sarmento ‘Meta Malik’, akompaña ho ha’u rasik, inaugura ona uma ba veteranu saudozu ‘Mau Tino’ iha Same no entrega ona ba nia espoza no oan na’in-rua,” Prezidente Konsellu Veteranu, Vidal de Jesus ‘Reak Leman’, informa ba Agência TATOLI, via telefónika, sábadu ne’e.

Notísia relevante: MAKLN-KKLN kria ekipa kontrola konstrusaun uma 96 ba veteranu

Konsellu Veteranu nasionál daudaun ne’e labele halo observasaun ba konstrusaun uma veteranu tanba situasaun pandemia no Serka Sanitária iha Dili.

“Daudaun ne’e, ita-nia ekipa Konsellu Veteranu Munisipál mak kontinua akompaña prosesu kontrusaun. Tuir ha’u-nia hatene, to’o agora uma rua mak finaliza ona, ida mak veteranu Afonso Malibuti iha Metinaro ne’ebe entrega no na’in uza ona no seluk mak ba saudozu ‘Mau Tino’,” nia esplika.

Iha fatin ketak, Prezidente Konsellu Veteranu Munisípiu Manufahi, Tobias Amaral Magno ‘Maksakur’, hateten, uma ba saudozu ‘Mau Tino’ konstrui hosi empreza Leohili hosi Same, ne’ebé família saudozu ne’e rasik mak kontrata.

Governu apoia osan $40.000 ba kada veteranu ne’ebé dedika-an durante tinan 20 to’o 24 ba luta independénsia nasionál, hodi konstrui uma, ne’ebé transfere ba idaidak ninia konta bankária.

Objetivu kontrusaun uma ba veteranu atu dignifika sira-nia dedikasaun, ne’ebé bainhira funu hotu iha tinan 1999, fila mai vila-laran laiha fatin hodi hela, tanba ne’e Governu liuhosi MAKLN halo programa hodi konstrui uma.

Antes ne’e, prevee orsamentu ba konstrusaun uma veteranu hamutuk 60 ne’ebé korresponde ho totál orsamentu millaun $2,4 maibé ikus mai aumenta ba uma hamutuk 96.

Jornalista : Osória Marques

Editora      : Julia Chatarina

HAKEREK NO HATÁN

Please enter your comment!
Please enter your name here