Ministru Ensinu Superiór, Siénsia no Kultura (MESSK), Longuinhos dos Santos. Entrega relatorio ba Universitario sira nebe’e hetan akreditasaun programatiku institusional 2021.iha salaun unital, sexta (23/07). Imajen TATOLI/Egas Cristóvão.

DILI, 23 jullu 2021 (TATOLI)—Ministru Ensinu Superiór, Siénsia no Kultura (MESSK), Longuinhos dos Santos husu reitór, dosente no estudante sira iha Timor-Leste atu kompleta vasina, nune’e bele reativa fila-fali aktividade aula prezensiál.

“Ha’u husu ona ba reitór sira, dosente sira, responsavel no estudante sira atu bele lalais vasina, nune’e ita bele reativa aula prezensiál. Tanba vasina ne’e atu hasa’e ita-nia imunidade no virus ne’e labele da’et,” Longuinhos dos Santos hateten ba jornalista sira hafoin hala’o lansamentu ba avaliasaun no akreditasaun programátiku no institusionál tinan 2021, iha Universidade Oriental Timor Lorosa’e (UNITAL), Becora, Dili, sesta ne’e.

Governante ne’e hatutan, sirkulasaun hosi MESSK atu reativa ensinu aprendizajen liuhosi aula prezensiál seida’uk hasai tanba iha loron 30 jullu sei konvoka reuniaun ho reitór sira iha Konsellu Reitores, atu bele kria diskusaun uitoan kona-bá estratéjia atu reativa ensinu aprendizajen.

Agora daudaun ekipa observadór sira no fiskalizasaun hosi MESSK tun ona ba instituisaun superiór sira atu halo identifikasaun manorin no estudante hodi universidade sira-ne’e pursentu hira mak simu ona vasina, tanba vasina mós hanesan rekizitu ida.

“Se sira hetan ona vasina doze daruak nian, liu-liu profesór, funsionáriu, estudante, no universidade ne’ebé simu vasina kompleta ona, nune’e ita bele reativa halo prezensiál,” nia dehan.

Entretantu ba universidade balun ne’ebé hahú ona prosesu aprendizajen, Governante ne’e hateten, MESSK halo intervensaun hodi husu atu bele kumpre regra ne’ebé Ministériu Saúde fó sai.

“Ministériu Saúde nia regra protokolu ne’e rigorozu katak ita atu kumpre de’it vasina doze daruak maibé kumpre mós regra hosi Organizasaun Mundiál Saúde nian hodi uza máskara, fase liman bebeik.

Aleinde ne’e, tuir planu iha reuniaun Konsellu Reitor ne’e mós sei fahe ekipamentu prevensaun ba COVID-19 nian mak hanesan máskara, handsanitazer no thermo scanner, ita sei fó mós ba universidade hotu-hotu,” nia informa.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here