Prezidente Repúblika, Francisco Guterres Lú Olo, hamutuk ho espoza, kompleta ona simu vasina AstraZeneca doze daruak. Imajen/Mídia PR.

DILI, 23 jullu 2021 (TATOLI)–Prezidente Repúblika, Francisco Guterres Lú Olo, hamutuk ho espoza, sesta ne’e simu ona vasina ho tipu AstraZeneca doze daruak iha Palásiu Prezidénsia, Nicolau Lobato, Bairru Pite, Dili.

“Liuhosi vasina ne’e, lori hasa’e ita-nia imunidade atu proteje ita-nia isin, proteje mós ba ita-nia família sira no enjerál ba ita-nia komunidade tomak,” Prezidente Repúblika Francisco Guterres Lú Olo hateten liuhosi diskursu antes atu simu vasina.

Tanba, Xefe Estadu ne’e hatete, moras ne’e oho ona ema barak iha mundu inklui Timor-Leste ne’ebé ema na’in-26 mate ho COVID-19, entaun ho razaun ne’e ema ida-idak lori nia-an ba seguransa saúde hodi bele hetan imunidade.

Prezidente Repúblika hateten informasaun ne’ebé halo ema hotu preokupa tebes mak variante foun Delta COVID-19 ne’ebé oho ema barak iha Indonézia, entaun nia husu ba povu tomak atu bele hakbesik an ba sebtru sa’ude hodi simu vasina.

“Ha’u husu ba imi hotu para iha disponibilidade hodi hakbesik-an ba sentru saúde ne’ebé besik hodi simu vasina, nune’e hodi bele proteje-an hosi moras COVID-19 ne’em,” Xefe Estadu apela.

Diretora Jerál Prestasaun Saúde, Ministériu Saúde (MS), Odete da Silva Viegas hateten, ohin semana ualu (8) ona hodi Prezidente Repúblika ho nia espoza, inklui funsionáriu Palásiu Prezidensiál simu vasina daruak nian ba AstraZeneca.

“Ohin, eventu importante ida tanba ita-nia Prezidente Repúblika hetan ona vasina doze daruak AstraZeneca, tuir tempu ne’ebé determina iha kalendáriu depois hetan vasina doze dahuluk hafoin liu semana ualu (8),” Odete haktuir.

Ida-ne’e hatudu ezemplu ba populasaun hotu-hotu iha Timor-Leste, nune’e ema hotu-hotu tenke simu vasina ne’e hodi bele proteje-an.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here