Profisionál saúde prepara vasina AstraZeneca, iha sentru saúde, kuarta (21/07/21). Imajen Tatoli/António Gonçalves.

DILI, 23 jullu 2021 (TATOLI)—Portavóz Komisaun Interministeriál ba Implementasaun Vasina COVID-19 Danina Coelho, hateten Munisípiu Dili, Covalima, Viqueque mak kobertura vasina COVID-19 aas iha Timor-Leste (TL).

Dadus hatudu katak, populasaun Dili hamutuk 126.570 iha pursentu 58 mak simu ona vasina, populasaun Viqueque hamutuk 18.141 iha pursentu 40 mak vasina ona no Covalima populasaun hamutuk 14.834 iha 40% mak simu ona vasina doze dahuluk.

Notísia relevante:COVID-19, rekoperadu 45 no ativu 726

“Ami enkoraza nafatin komunidade iha munisípiu hotu-hotu atu bele simu vasina iha tempu badak, nune’e bele proteze sira nia-an hosi impaktu COVID-19,” Danina Coelho hateten iha salaun MSSI, Caicoli sesta ne’e.

Dadus ne’e mós hatudu katak, sira ne’ebé simu ona vasina maka populasaun elijível hosi  munisípiu Dili, Viqueque no Covalima  mak hanesan autoridade lokál, lideransa relijioza no pesoál saúde-sira  inklui sira ne’ebé idade 18 ba leten.

To’o ohin loron, ema 262.933 (35%) mak simu ona vasina ba doze dahuluk no ema na’in 74.918 (10%) mak simu ona vasina ba doze daruak nian iha territóriu tomak.

Dadus hosi Sentru Integradu Jestaun Krize (SIJK) to’o ohin, TL rejista ona kazu konfirmadu COVID-19 hamutuk 10.227, entre númeru hirak-ne’e na’in 26 mak mate ho COVID-19.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here