Tezoureira Centro Formação Kadi Kakutak (CFKK), Octavia Marciana de Sousa do Rego. Imajen Tatoli/Nelia Fernandes.

DILI, 23 jullu 2021 (TATOLI)—Tezoureira Centro Formação Kadi Kakutak (CFKK), Octavia Marciana de Sousa do Rego, informa iha pandemia COVID-19 ne’e sentru ne’e realiza formasaun ba joven sira liuhosi plataforma online hodi transforma koñesimentu ba joven sira, nune’e bele prepara ba futuru hodi dezenvolve TimorLeste.

“Partisipante sira estuda liuhosi plataforma online hanesan google meet. Maibé antes atu ba aula, ami kria uluk grupu hosi whatsApp, depois atu hahú aula ami kria link manda ba iha grupu whatsApp hafoin ami hahú aula liuhosi plataforma google meet. Tanbá, agora ami seidauk iha fatin ba formasaun nian, maibé ami fasilita formasaun ba kolega sira liuhosi online,” Octavia Marciana de Sousa do Rego, hateten ba Agência Tatoli iha Camea, Bedois, Dili, sesta ne’e.

Objetivu estabelese sentru ne’e atu hakle’an liutan koñesimentu juventude sira-ne’ebé seidauk tuir formasaun no hakarak transforma koñesimentu hirak ne’e hodi nune’e bele prepara juventude sira ba futuru involve iha dezenvolvimentu nasionál.

Atu hakle’an joven sira-nia kuñesimentu, iha sentru formasaun ne’e, joven sira-ne’ebé rejistu ne’e hodi tuir formasaun iha lian inglés, porugés, liuhosi atividade diskusaun no halo palestra iha semana nia rohan.

“Iha fim de semana ami sempre iha palestra ba partisipante sira. Iha palestra ne’e uza lian tetun tanbá palestra ne’e loke ba públiku. Kona-ba diskusaun nian, partisipante lian portugés no inglés, mak prátika ko’alia lian sira-ne’e liuhosi diskusaun,” nia dehan.

Konabá oradór sira, nia dehan, timor-oan sira ne’ebé eskola iha rai-li’ur hodi fahe sira-nia esperiénsia ba joven sira, atu nune’e bele motiva joven sira hodi bele iha mehi atu eskola iha rai-li’ur.

“Iha palestra ne’e oradór sira fahe esperiénsia oinsá atu eskola iha rai-li’ur. Tanba dala ruma ema la hatene eskola iha rai-li’ur ne’e oinsá, liu-liu fahe esperiénsia konabá prosesu no lala’ok bainhira atu tuir bolsa estudu ida atu eskola iha rai-li’ur,” nia haktuir.

Atividade palestra durante ne’e, nia informa, partisipante sira-ne’ebé partisipa hamutuk 100 resin tanba oradór timor-oan sira-ne’ebé maihosi no akaba ona sira-nia estudu iha Portugál, Brazil, inklui Timor-Leste ne’e mesak dosente maestradu sira.

Centro Formação Kadi Kakutak, estabelese iha loron 31 maiu iha tinan 2020, no totál formadór hamutuk 20 ne’e maihosi estudante sira-ne’ebé halo estudu iha Filipina, Moçambique, Caboverde, Brazil, Portugál, India, no inklui TimorLeste.

Enkuantu, totál partisipante ne’ebé tuir formasaun iha sentru Formasaun Kadi kakutak hosi estabelesimentu to’o agora hamutuk 670 no hosi númeru ne’e parsipante maihosi estudante sira-ne’ebé akaba estudu iha rai-li’ur hanesan Indónezia inklui estudante iha rai laran.

Entretantu, iha tinan 2021 ne’e parsipante ba área formasaun lían inglés hamutuk 370 no lían portugués partisipantes hamutuk 300 no to’o agora seidauk termina.

“Formasaun ba tinan ne’e la’o hela, tanbá partisipante sira tuir formasaun liuhosi online,” nia dehan.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here