TBC. Ilustrasaun

DILI, 23 jullu 2021 (TATOLI)—Hahú hosi fulan abríl to’o juñu tinan ne’e, Fundasaun Klibur Domin rejista pasiente Tuberculose (TBC), hamutuk 80 iha munisípiu Dili, Baucau, Liquiça no Viqueque.

“Iha Dili ami kobre de’it iha postu administrativu Ataúro no semana oin mak ami kobre fali iha postu administrativu Metinaro. Tanba ne’e iha Liquiça no Viqueque ami detekta kazu 59 no Munisípiu Baucau ho postu administrativu Ataúro hamutuk 21,” Diretór Ezekutivu Fundasaun Klibur Domin, Joaquim Freitas Soares, hateten ba jornalista Agência Tatoli via telefónika, sesta ne’e.

Notísia relevante:OMS adota pilár tolu kombate TBC iha TL

Pasiente hirak ne’e detatu liu hosi atividade ida hosi Fundasaun Klibur Domin ho naran jestaun kazu Tuberculose ativu.

Programa ida-ne’e, pesoál-sira tun ba suku no aldeia buka ema-sira ne’ebé moras TBC,  iha uma-ka’in balun pesoál sira  detekta  katak, iha ema ne’ebé iha  síntoma ba TBC  no rekolla kedan amostra  hanesan kabeen-tasak lori ba halo ezame iha laboratóriu.

Hosi pasiente sira ne’ebé detetadu, balun lori ba baixa iha klínika internametu  Klibur Domin hamutuk  21, hodi hetan tratamentu no bele asesu ba fornesimentu nutrisaun atu bele deskansa di’ak  bainhira tama ona iha faze intensivu hodi  rekopera bele fila ba uma.

Ekipa ne’ebé tun ba terrenu hodi halo atividade jestaun kazu TBC ativu iha Munisípiu Liquiça hamutuk na’in-tolu, Baucau iha na’in-lima, Viqueuqe  na’in-lima inklui postu administrativu Ataúro na’in-ida hodi buka kazu no rekolla kabeen tasak.

Ekipa ne’ebé serbisu iha Klibur Domin no foka liu ba área TBC hamutuk 17 iha munisípiu Liquiça na’in tolu, Viqueque ema na’in-lima, Baucau na’in-lima no Ataúro na’in-ida inklui Klibur Domin Tibar iha na’in-tolu.

Desde 2016, Ministériu Saúde (MS) asina akordu ho Fundasaun Klibur Domin Tibar to’o agora tanba fundu -sira ne’e maihosi fundu globál, hodi implementa ba atividade refere ba tinan tolu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here