Sekretária Estadu Komunikasaun Sosiál (SEKOMS), Merício Juvinal dos Reis ‘Akara’, no membru Governu sira inklui entidade relevante halo diálogu komunitáriu iha sede suku Euquise, kinta (22/07). Imajen TATOLI/Natalino Belo

LAUTÉM, 22 jullu 2021 (TATOLI)—Sekretária Estadu Komunikasaun Sosiál (SEKOMS), Merício Juvinal dos Reis ‘Akara’ hamutuk ho membru Governu balun halo diálogu komunitáriu iha suku Euquise postu admistrativu Lautém, munisípiu Lautém, liuhosi programa ‘naroman ba suku’ hodi rona preokupasaun povu.

“Programa ne’e hosi SEKOMS ho objetivu atu hakbesik entre povu no Governu atu hatene kondisaun no fahe informasaun ba povu. Programa ne’e fasilita informasaun hosi Governu ba povu no povu ba Governu,” Sekretáriu Estadu hateten iha sede suku Euquise, kinta ne’e.

Komunidade suku Euquise prepara simu membru Governu sira no entidade relevante iha sede suku, kinta (22/07). Imajen TATOLI/Natalino Belo

Iha fatin hanesan, Xefe suku Euquise, Tomas X. Soares, agradese ba membru Governu ne’ebé marka prezensa iha diálogu ne’e hodi rona direta prekupasaun povu.

“Maski iha limitasaun oinoin hanesan situasaun pandemia, maibé la satán vontade membru Governu sira to’o diretamente mai suku ne’e, ne’ebé kuaze ukun tinan barak ona foin mak akontese vizita ne’e,” nia tenik.

Antes hahú diálogu ho komunidade, governante sira halo vizita ba aldeia Barleo hodi haree kondisaun infraestrutura bázika inklui fatin abrigu eroi libertasaun nasionál sira.

Líder komunitáriu hato’o preokupasaun infraestrutura bázika

Iha diálogu komunitáriu ne’e, Xefe suku Euquise, hato’o preokupasaun kona-ba infraestrutura bázika hanesan eletrisidade, estrada, bee-mos no irrigasaun.

“Prekupasaun sira ne’e uluk kedas komunidade hasoru, maibé laiha serteza ruma tantu proposta no diálogu,” nia akresenta.

Xefe suku Euquise, Tomas X. Soares. Imajen TATOLI/Natalino Belo

Iha tempu udan, komunidade sira hasoru difikuldade atu lori produtu fa’an iha merkadu no atu ba konsulta iha sentru saúde.

“Polítika Governu dehan kada suku atu konstrui postu saúde ida, maibé suku ne’e laiha,” Tomas hatutan.

Enkuantu, kona-ba irrigasaun, iha parte Luagata tinan 20 ona la halai natar tanba irrigasaun a’at, iha Lauimi I di’ak maibé iha Lauimi II la funsiona.

“Natar iha Batagua ektare 100 resin agora sai fali mota no Lauimi II hela ektare ida mak komunidade utiliza, bainhira tempu udan bee-mota ameasa estraga natar tanba laiha barranjen atu satán netik bee iha rai ektare 271,” Tomas haktuir.

Nune’e mós iha uma-kain 52 iha aldeia Barleo mak seidauk asesu elektrisidade inklui bee-mos.

Diálogu ne’e partisipa mós hosi Vise-Ministra Solidariedade Sosiál no Inkluzaun, Signi Candrawati Verdial, Vise-Ministru Obra Públika, Nicolau Lino Freitas Belo, Vise-Ministru Agrikultura no Peska, Abílio Xavier de Arújo, Prezidente Konsellu Imprensa, Virgílio Guterres, inklui autoridade munisípiu Lautém, líder komunitáriu inklui komunidade suku Euquise.

Suku Euquise kompostu hosi aldeia tolu hanesan Barleo, Borobato no Vaniria, ho totál populasaun 1.412, hosi totál uma-kain 341.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here