Pontu Fokál ba Mitsubishi Asian Children’s Enikki Festa Timor-Leste, Júlio Gusmão Amaral. Imajen Tatoli/Nelia Fernandes.

DILI, 22 jullu 2021 (TATOLI)—Governu liuhosi Sekretária Estadu Arte no Kultura (SEAK), finaliza ona kompetisaun “Mitsubishi Asian Children’s Enikki Festa” ba labarik sira ne’ebé hala’o iha munisípiu Ainaro, Manatuto no Bobonaro.

Notísia Relevante: SEAK hala’o kompetisaun “Mitsubishi Asian Children’s Enikki Festa” ba labarik sira

“Kompetisaun ba munisípiu tolu ne’e ita finaliza ona no obra dezeñu hosi estudante sira-ne’e,  ekipa rekolla hotu mai iha ne’e ona (SEAK) atu halo verikiasaun,” Pontu Fokál ba Mitsubishi Asian Children’s Enikki Festa Timor-Leste, Júlio Gusmão Amaral, hateten ba Agência Tatoli, iha nia knaar fatin, Avenida Portugál, Dili, ohin. 

Nia informa, obra dezeñu hosi estudante sira-ne’e iha semana oin ekipa sei halo verifikasaun ba dadus hanesan idade hosi estudante nian, feto no mane hira mak partisipa iha kompetisaun refere no ekipa sei deside loron ruma hodi halo avaliasaun nasionál.

Kompetisaun ne’ebé realiza iha munisípiu Ainaro ne’e, ekipa SEAK realiza ho susesu tanba akompaña kedas estudante sira halo prátika ba dezeñu nian, nune’e estudante sira bele tuir kompetisaun ne’e ho susesu.

Iha munisípiu Ainaro, SEAK nia trajetu ka alvu ne’e estudante na’in-70 maibé iha loron kompetisaun ne’e estudante ida la marka prezensa, entaun estudante sira-ne’ebé tuir kompetisaun ne’e hela na’in-69 de’it.

“Ekipa ba iha munisípiu Ainaro, haree ba estudante no profesora sira entuziasmu makaas tebes ba kompetisaun refere no estudante sira partisipa másimu. Profesór sira koordena no kolabora di’ak ho ami no estudante sira kontente, tanba ami esplika kritériu atu tuir kompetisaun ne’e. Ami enkoraja tuir kompetisaun ne’e, bainhira hetan klasifikasaun di’ak ne’e sei hetan premiu no sei partisipa iha serimónia entrega prémiu iha Japaun. Profesór sira mós motiva makaas, oinsá estudante sira bele foti Ainaro nia naran iha mundu,” nia dehan.

Aleinde ne’e, nia informa, ekipa mós halo ona kompetisaun hanesan iha Munisípiu Bobonaro no Manatuto. Ekipa ba Munisípiu iha 19 jullu no 20 jullu realiza kompetisaun no iha munisípiu Manatuto ekipa ba iha loron 20/7 no kompetisaun desenu ita realiza iha loron 21/7, entaun obra deseñu hosi estudante sira-nian agora iha ona ansionál.

Iha parte seluk, Koordenadór Interinu Eskola Bázika Central CAFE Ainaro, Antonio João de Araujo Ribeiro, agradese tebes ba Governu liuhosi Sekretária Estadu Arte no Kultura (SEAK) tanbá bele realiza ona kompetisaun ne’e tanbá ho kompetisaun ne’e bele motiva estudante sira liu-liu iha parte deseñu nian.

“Iha kompetisaun ne’e, estudante sira-nia partisipasaun másimu tanba sira iha interese duni atu kompete iha kompetisaun ne’e no profesór sira mós fó motivasaun ba estudante sira atu gaña iha sira-nia dezeñu rasik,” Antonio João de Araujo Ribeiro hateten ba Agência Tatoli, via telefónika, ohin.

Kompetisaun deseñu ne’e hanesan arte ida tanbá liuhosi arte bele dezenvolve estudante sira-nia talenta, nune’e nia husu ba Governu atu tau profesór espesialidade ba arte nian, ho nune’e bele fó formasaun ba estudante sira hodi bele dezenvolve estudante sira-nia talentu iha futuru.

Totál estudante iha Eskola Bázika Central CAFE Ainaro hamutuk na’in-321 no hosi númeru refere, estudante na’in-15 mak partisipa iha kompetisaun dezeñu refere.

Entretantu totál partisipante hosi Munisípiu tolu ne’ebé tuir kompetisaun hamutuk 217 no hosi númeru ne’e iha munisípiu Ainaro hamutuk 69 hosi Eskola Bázika Filial Uma-Forma, Eskola Bázika Filial Dr. Jacob Xavier, no Eskola Bázika Central CAFE Ainaro.

Ba munisípiu Bobonaro iha parte Atabae partisipante hamutuk 80 ne’e hosi Eskola Ensinu Báziku Filiál Katólika (EBFC) St. Arnaldo Jansen, Ensinu Báziku Filiál (EBF) Futubaba, Ensinu Báziku Filiál (EBF) Ailoklaran, Ensinu Báziku Filiál (EBF) Sulilaran, no Ensinu Báziku Filiál Katólika (EBFC) Espirito Santo.

Iha Munisípiu Manatuto, totál partisipante hamutuk 68 ne’e maihosi Ensinu Báziku Filiál (EBF) St. António, Ensinu Báziku Filiál (EBF) Obrato, Ensinu Báziku Filiál (EBF) Aiteas, Ensinu Báziku Filiál (EBF) Rentau CAFE Manatuto no Ensinu Báziku Filiál Katólika (EBC) Beadi.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here