Konferénsia imprensa LFTL. Imajen Tatoli/Dok

DILI, 22 jullu 2021 (TATOLI) Diretór Finansas Liga Futeból Timor-Leste (LFTL), Caetano Cárceres Correia, informa  daudauk ne’e órgaun liga seidauk hetan orsamentu hodi hala’o servisu administrasaun maski tuir kalendáriu jogu sei hala’o  iha agostu mai ne’e.

“Agora ami seidauk iha orsamentu atu hala’o servisu, maibé dalaruma semana ida ka rua tan osan bele iha ona atu hala’o servisu, depende ba Governu transfere ba FFTL aloka mai liga hodi prepara servisu administrasaun ba liga,” Caetano Cárceres Correia, hateten ba Agência Tatoli iha edifísiu LFTL, kinta ne’e.

“Uluk osan ita nian Governu aloka mai hodi halo preparasaun ba liga tomak hamutuk $350.000, maibé agora tun ba $310.00. Hosi osan  $310.000 ne’e 65% ami aloka ba atividade jogu nian rasik, restu mak ami aloka ba operasaun administrasaun,” nia hateten.

Hatán ba kestaun ne’e, Sekretáriu Estadu Juventude no Desportu (SEJD), Abrão Saldanha hateten, proposta atu haruka osan ba Federasaun Futeból Timor-Leste (FFTL) hodi aloka ba LFTL sei iha faze avaliasaun.

“Proposta iha ona ami. Ami mós sei liga fali ho FFTL para bele realize jogu hafoin ami haruka osan ba.  Ami mós husu ona ba FFTL atu haruka lai protokolu COVID-19 nian atu haruka ba Sala Situasaun Jestaun Krize (SIJK) aseita ona ita lao tuir protokolu, foin hala’o jogu, osan iha ita sei hein prosesu sira ne’e hotu,” Abrão Saldanha hateten.

Membru Governu ne’e, relata jogu atu hala’o agostu ka lae depende ba Sentru Integradu Jestaun Krize (SIJK) mak sei deside bazeia ba protokolu ne’ebé haruka ona ba.

Jornalista       : Hortencio Sanchez

Editór             : Francisco Simões

 

HAKEREK NO HATÁN

Please enter your comment!
Please enter your name here