Klínika Bairro Pité. Imajen/vega1892

DILI, 22 jullu 2021 (TATOLI)–Gabinete Apoiu Sosiedade Sivíl (GASC, sigla portugés) apoia orsamentu hodi dezeña edifísiu foun klínika Bairro Pité ne’ebé planeia sei konstrui iha tempu badak.

Tanba ne’e, Diretór klínika Bairro Pité, Inâcio dos Santos, hala’o enkontru ho Koordenadór GASC, Filipe da Costa, hodi haree preparasaun planu mestre ne’ebé daudaun ne’e prepara ona hosi parte klínika rasik.

“Planu mestre sei hahú iha tinan ne’e no Gabinete Apoiu Sosiedade Sivíl sei fó apoiu orasamentu hamutuk $25.793 ba dezeñu no Bill of Quantity (BoQ) edifísiu klíniku ne’e rasik, ne’ebé bainhira finaliza ona iha tempu badak sei halo kontrusaun edifísiu foun,” Diretór klínika hateten liuhosi nota ne’ebé Agência TATOLI asesu, iha kinta ne’e.

Durante enkontru, parte rua ko’alia mós kona-ba fasilidade klínika ne’ebé daudaun la favorese ona ba tratamentu públiku, nune’e presiza fali harii klínika tuir padraun saúde nian.

Iha fatin hanesan, Koordenadór GASC, Filipe da Costa, dehan, apoiu fundu ne’e ba atividade operasionál klínika no verba balun ba dezeñu no ba konstrusaun edifísiu.

“Ita sei aproxima empreza balun halo dezeñu ne’ebé di’ak inklui BoQ,” nia hatutan.

Tuir planu, klínika foun sei harii iha terrenu atuál tuir padraun saúde internasionál, nune’e bele fó tratamentu dignu ba populasaun sira.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here