Presidente CCI-TL, Oscar Lima. Imajen TATOLI/Egas Cristóvão

DILI, 22 jullu 2021 (TATOLI)-Estrutura Kámara Komérsiu Indústria Timor-Leste (CCI-TL, sigla portugés) nível nasionál no munisipál realiza reuniaun hodi halo diskusaun nakloke atu husu Governu fó oportunidade atu envolve emprezáriu sira ba planu rekuperasaun ekonómika. 

“Ami-nia diskusaun foku ba rekuperasaun ekonómika atu Governu fó oportunidade ba emprezáriu sira envolve  ka partisipa direta iha  planu rekuperasaun ekonómika,” Prezidente  CCI-TL, Oscar Lima, hateten, hafoin reuniaun iha edifísiu Acait, kinta ne’e.

Nune’e, reuniaun hanesan sei realiza dala-ida tan no sei halo karta eskrita ida haruka ba Primeiru-Ministru, Taur Matan Ruak no Ministru Koordenadór Asuntu Ekonómiku (MKAE), Joaquim Amaral, kona-ba inisiativa sira.

“Ami sei prepara karta no tempu besik ami submete ba Governu atu haree setór saida mak emprezáriu sira bele halo ka kontribui iha planu rekuperasaun ekonómika,” akresenta.

Tuir emprezáriu ne’e, planu rekuperasaun ekonómika atu la’o di’ak tenke haree liu ba setór produtivu hanesan agrikultura no turizmu tanba investimentu iha setór ne’e sei kiik tebes.

Antes ne’e, iha agostu 2020, Konsellu Ministru aprova planu rekuperasaun ekonómika ne’ebé aprezenta hosi Komisaun Elaborasaun Rekuperasaun Ekonómika.

Planu ne’e prevee medida balun, ho objetivu halo rekuperasaun pós COVID-19, ne’ebé fahe ba setór prioritáriu hanesan agrikultura, turizmu, abitasaun, kapitál umanu (edukasaun, saúde no protesaun sosiál) no iha área reforma institusionál.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here