Primeiru-Ministru, Taur Matan Ruak, konvoka enkontru ho Provedora Direitu Umanu no Justisa, Jesuina Maria Fernandes Gomes, iha rezidénsia Farol, kuarta (21/07). Imajen TATOLI/Francisco Sony

DILI, 21 jullu 2021 (TATOLI)–Provedora Direitu Umanu no Justisa, Jesuina Maria Fernandes Gomes, hasoru malu ho Primeiru-Ministru (PM), Taur Matan Ruak, hodi entrega kopia relatóriu tinan 2020 ho rekomendasaun atu konsidera no aselera prosesu ratifikasaun kovensaun internasionál direitu ema ho defisiénsia.

Antes ne’e, Provedoria Direitu Umanu no Justisa (PDHJ, sigla portugés) hato’o ona relatóriu ba Parlamentu Nasionál (PN) ho rekomendasaun.

“Governu tenke halo preparasaun no Parlamentu Nasionál ratifika, bainhira PDHJ entrega relatóriu anuál 2020 ba Prezidente Parlamentu Nasionál, hato’o mós katak prosesu mai hosi Governu, tanba ne’e tenke aselera tanba Timor-Leste iha ema ho defisiénsia kuaze 38.000 no importante tebes Estadu ratifika konvesaun ne’e,” Provedora informa hafoin ramata reuniaun ho Xefe Ezekutivu iha rezidénsia Farol, kuarta ne’e.

Provedora Direitu Umanu no Justisa, Jesuina Maria Fernandes Gomes. Imajen TATOLI/Francisco Sony

PDHJ mós rekomenda ba Ministériu Interiór atu hadi’a fasilidade sela detensaun Polísia Nasionál Timor-Leste (PNTL) inklui ekipamentu sira ne’ebé hanesan uniforme no promosaun ba Polísia.

Rekomenda mós ba Ministériu justisa atu tau-matan ba fasilidade prizaun sira, tanba kada sala akumula prezu barak ho kondisaun ne’ebé presiza hetan atensaun másimu hosi Governu, inklui kondisaun ba guarda prizionál ne’ebé hala’o knaar hanesan uniferome, promosaun no nesesidade seluk.

“Ami haree kapasidade prizaun Becora bele akomoda prezu 200-resin de’it, maibé realidade númeru prezu iha 500-resin ona, maski Timor-Leste iha prizaun tolu, posibilidade atu loke tan ka lae, ne’e kompeténsia Governu, ami rekomenda de’it atu oinsá prezu sira bele goja sira-nia direitu iha prizaun, sira lakon de’it direitu ba liberdade maibé direitu sira seluk ne’e Estadu tenke asegura nafatin. Prizaun Becora ne’e akumula ema barak demais,” Provedora haktuir.

Biban ne’e, provedora partilla ba PM kona-ba dezafiu ne’ebé provedoria enfrenta ein termu fasilidade, nune’e rona mós hanoin kona-ba situasaun governasaun.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here