Espoza Prezidente da Republika, Cidalia Mozinho. Imajen Tatoli/Egas Cristóvão.

DILI, 20 jullu 2021 (TATOLI)—Espoza Prezidente Repúblika, Cidália Nobre Lopes Mouzinho Guterres hateten joven sira tenke sai ajente ba mudansa iha sosiedade no iha nasaun Timor-Leste.

“Joven sira tenke sai nu’udar ajente ba mudansa iha ita-nia sosiedade no nasaun. Ita hotu hatene katak Juventude mak sai forsa moris ba prosesu dezenvolvimentu tomak, nune’e juventude tenke sai duni sentru ba atensaun polítika Governu nian,” Espoza PR hateten iha nia diskursu, iha Konferénsia Nasionál ho tema “Hametin no Haburas Ezisténsia Organizasaun hodi Kaer Metin Prinsípiu no Valores Estadu Direitu Demokrátiku iha Prosesu Dezenvolvimentu Nasionál,” iha salaun Katedral Bebora, Vila Verde, Dili, tersa ne’e.

Iha prova ne’ebé hatudu ona katak, liuhosi esperiénsia pasadu juventude hola responsablidade no hola parte ativu iha prosesu tomak luta ba libertasaun nasionál, brani hodi see hirus-matan no simu sakrifísiu ba Timor-Leste nia ukun rasik-aan tanba juventude mak patriota.

Espoza PR hatutan Konsellu Nasionál Juventude Timor-Leste (CNJTL-sigla portugés) nu’udar organizasaun ho nia papél importante hodi reforsa involvementu no promove partisipasaun foinsa’e sira-nian iha prosesu hotu hotu.

Esforsu Estadu liu-liu Governu establese lei no polítika sira, hodi fó garantia ba partisipasaun foinsa’e sira-nian liuhosi aprovasaun Polítika Nasionál Juventude (PNJ) iha fevereiru 2016, tanba PNJ mak nu’udar matadalan no enkuadramentu ida-ne’ebé orienta intervensaun loloos ba situasaun joven sira-nian.

“Ha’u fiar metin katak Governu liuhosi Sekretariu Estadu Juventude no Desportu (SEJD) no liña ministeriu relevante sira, sei fó atensaun nafatin ba asuntu juventude sira,” nia dehan.

Inan ba nasaun ne’e hateten, PNJ hala’o ho enkuadramentu legál oioin fó mós espasu no oportunidade ba joven sira-nia partisipasaun iha eleisaun lideransa komunitária, ne’ebé involve foinsa’e feto no mane ho kualidade hodi reprezenta foinsa’e sira iha kada konsellu suku.

Governu mós aprova ona rezolusaun Númeru 23 de 18 Novembru 2010, kona-bá programa Parlamentu Foinsa’e hodi fó espasu aprendizajen ida-ne’ebe independente, demokrátiku no apartidaria (lahó partidu) hodi promove liután foinsa’e sira-nia partisipasaun no sensibilizasaun kona-bá direitu no dever sira nu’udar sidadaun.

“Ha’u hein katak iha diskusaun sira durante konferensia ida-ne’e, sei tau pozisaun CNJTL nian nu’udar organizasaun mahon ba foinsa’e sira, ne’ebe bele enkoraja involvimentu  juventude iha Partidu Politiku hotu-hotu, hodi kanaliza aspirasaun no partisipasaun juventude sira-nian iha dezenvolvimentu nasionál,” nia dehan.

Nia hein katak, konferénsia ida-ne’e nu’udar mekanizmu ida atu  CNJTL nu’udar organizasaun foinsa’e sira-nian, konsulta no  reve fila-fali  planu no programa  ne’ebe iha tiha ona atu buka koordena ho institusaun relevante, oinsá mak bele hakbit liután kapasidade foinsa’e sira-nian, hodi fasilita no perpara joven sira sai modelu di’ak no kuadru kompetente ba Timor-Leste nia futuru.

“Ha’u hakarak fó hanoin ba konferensista sira katak joven mak sai aliserse no xave ba família, modelu hodi transforma sosiedade no nasaun,” nia hateten.

Sekretáriu Estadu Juventude no Desportu, Abrão Saldanha. Imajen Tatoli /Egas Cristovão.

Sekretáriu Estadu Juventude no Desportu (SEJD), Abrão Saldanha hateten Estadu presiza rona no responde ba povu nia pretesaun servisu públika sira, tanba CNJTL nia misaun mak hasa’e joven nia koñesimentu iha prosesu harii dame no hametin unidade nasionál, promove valór sira, edukasaun sívika ba futuru lideransa iha partidu polítiku.

Governante ne’e husu konferensista sira iha Konferénsia Nasionál atu diskute no explora meu no oportunidade para oinsá CNJTL hola papél ativu hodi tau-matan ba prosesu implementasun polítika nasionál juventude nian.

“Ha’u hakarak apresia esforsu sira maske ita hasoru hela situsaun pandemia COVID-19, ita-boot sira konsege organiza no mobiliza partisipasaun iha Konferénsia Nasionál. Garante katak ema hotu-hotu partisipa ativamente iha prosesu dezenvolvimentu iha ita-nia rain,” nia dehan.

Tanba haree ba lealidade kuantidade populasaun iha 75%, populasaun kuantidade menus hosi tinan 35 no joven ho idade maioria 21 ne’e ninia dever boot liu ba rai ida-ne’e.

Vise Prezidente Parlamentu Nasionál, Maria Angelina Sarmento hateten joven sira mak tenke buka oportunidade tanba Governu no Estadu ida-ne’e ninia papél mak atu kria kondisaun, atu asegura katak juventude sira-nia nesesidade ba formasaun sira iha kondisaun ba sira atu aprende maibé motivasaun tenke mai hosi joven sira.

Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

“Ha’u hakarak husik hela lia menon ba ita-boot sira katak ita-nia Estadu no Governu iha dedikasaun tebe-tebes atu fó apoiu ba juventude sira-nia inisiativa. Dedikasaun ida-ne’e ita hahú hosi Governu kria ona rezolusaun ida kona-ba polítika nasionál ba juventude Timor Leste nian,” nia dehan.

Polítika nasionál ida-ne’e fó biban ba Governu atu bele kria oportunidade ba kapasitasaun no hasa’e koñesimentu ba joven sira, atu nune’e bele iha dezempeñu ida di’ak liután iha setór sosiál no ekonómia.

Maibé, nia dezafia juventude sira iha faze ida Independénsia nian ba libertasaun povu atu bele sai kampiaun ba setór hotu-hotu hanesan setór edukasaun, desportu iha arte no ekonómia iha mós polítika.

“Hein katak ho kontribuisaun, partisipasaun juventude sira-nian la’ós de’it iha polítika maibé ekonómia mós ita-boot sira bele sai kampiaun. Iha desportu joven barak mak sai ona kampiaun no lori Timor-Leste nia naran morin tebes iha mundu. Ezemplu de’it ita-nia joven atleta no mós atleta difisiénte sira,” nia hateten.

Vise Prezidente PN ne’e hateten, CNJTL sai hanesan plataforma importante ida atu joven sira bele enkamiña pensamentu, nesesidade sira hotu ne’ebé joven sira iha no bele sai organizasaun sumbriña ida ho karáter advokásia ida-ne’ebé forte, atu bele kontinua halo advokásia ba órgaun Estadu hotu-hotu hodi bele aposta sira-nia polítika ba juventude iha prosesu dezenvolvimentu no rekonstrusaun ba país ne’e.

Prezidente CNJTL, Maria Dadi Soares Magno. Imajen Tatoli/Egas Cristovão

Prezidente Konsellu Nasionál Juventude Timor-Leste (CNJTL-sigla portugés), Maria Dadi Magno, hateten iha konferénsia ne’e CNJTL hato’o rekomendasaun no rezolusaun tolu (3) no rezolusaun dahuluk mak atu aprova estatutu no rejimentu.

Rezolusaun segundu, nia dehan, haree liu ba parte internu no externu. Parte interna sei ko’alia kona-ba fortalesimntu instituisionál no parte eksterna haree kona-ba liña jerál tanba organizasaun ida tenke iha nia planu estratéjia.

Rezolusaun terseiru, kontinua ho sustentabilidade no husu ba Estadu no Guvernu atu hamosu rezolusaun ida-ne’ebé konsidera Organizasaun CNJTL hanesan rezisténsia ba programa nia finanseiru integra iha Orsamentu Jerál Estadu (OJE).

“Pilar lima ne’ebé importante mak estratéjia intervensaun tenke halo liu-liu ita forma ona Konsellu Nasionál Dezenvolvimentu ne’ebé mak CNJTL mós postura iha ne’ebá. Ita-nia Sekretáriu mak reprezenta Organizasaun ida-ne’e atu diskute kle’an plataforma atividade ne’ebé mak liga ba grupu alvu sira liu-liu juventude ho defisiénsia, juventude agrikultura, juventude feto ho mane ne’ebé iha área rurál, juventude ne’ebé moris iha risku nia-laran, juventude sira-ne’ebé mak iha iha abilidade maibé laiha oportunidade,” nia dehan.

Nia hateten, la’ós de’it polítika Guvernu maibé liuliu organizasaun CNJTL ne’ebé transforma hosi Juventude Lorico Assua’in no organizasaun nia baze fundamentu ne’ebé ninia rezisténsia kontinua iha prosesu konstrusaun Estadu no prosesu dezenvolvimentu atu hakuak juventude hotu-hotu.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here