Komunidade kontinua simu vasina Sinovac doze dahuluk iha Maternidade Fatumeta, kinta (08/07/21). Imajen Tatoli/António Gonçalves.

DILI, 19 jullu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu pozitivu 14, rekoperadu 30 no kazu ativu 766.

“Kazu foun 14 hosi Dili 11 no munisípiu-sira seluk tolu, kompostu hosi mane na’in-sia no feto na’in-lima,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, segunda ne’e.

Notísia relevante:COVID-19, rekoperadu 55 no ativu 782

Hosi totál kazu detetadu foun ohin, ho idade 12 mai karaik laiha, entre tinan 12-59 na’in 13 (92,8%), idade 60 mai karaik  na’in-ida. Hosi kazu detetadu foun ohin 0% sintomátiku.

Kumulativu kazu konfirmadu sura hosi 21 marsu 2020 to’o 19 jullu 2021 hamutuk 10.142. Hosi horisehik mai ohin, teste ne’ebé Laboratóriu Nasionál Saúde halo hamutuk 298 PCR, ho detallu hanesan tuir-mai, Vijilánsia sentinela laiha, rastreiu ba kontaktu ka Contact tracing 16, Rastreiu Aleatóriu ka Random Screening na’in-ida, Viájen sai-hosi serka sanitária hosi Dili 159, Viájen internasionál 84, Follow up iha kuarentena na’n 38.

Totál testes PCR ne’ebé halo horisehik 18 jullu iha Munisípiu-sira seluk, RAEOA no HNGV hamutuk 114 ho detalla hanesan tuir-mai, Maubisse 25, Maliana haat, Viqueque sia, Suai hitu, Baucau 36, Ermera 16, RAEOA sia no HNGV ualu.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 19  jullu tuir sistema informasaun Sáude iha Ministériu Saúde, totál  kumulativu doze dahuluk iha Dili 121.841 (56,9%) no  totál  kumulativu doze  daruak iha Dili 43.982 (20,5%).

Ema ne’ebé simu ona vasina doze dahuluk iha Timor-Leste 250.644 (33,2%) no simu ona doze daruak  56.627 (7,5%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 3,0/100 mil abitante, enkuantu ba de’it munisípiu Díli 7,4/100 mil abitante.

Insidénsia iha leten sei nafatin hatudu katak Munisípiu Dili maka fatin ho risku bo’ot liu atu populasaun hetan da’et no hada’et tutan virus SARS-CoV-2.

Informasaun hosi izolamentu

Iha 19 jullu 2021, izolamentu Vera Cruz halo tratamentu ba kazu detetadu na’in 11, Iha área obstetrisia na’in-rua no iha medisina interna na’in-ualu  iha sirurjia na’in-rua. Iha obstetrisia na’in-tolu kategoria leve (mild) hotu. Iha área medisina interna na’in-ualu. Rua grave, uza ventiladór na’in-rua moderadu  nain-tolu leve mild hotu. Sira nain-rua iha sirurjia kategoria leve mild hotu.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Apelu

Apela ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira-ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here