Inan-faluk ho kondisaun defisiénsia, Teresinha Gusmão. Imajen Tatoli/Celestina Teles

COVALIMA, 16 jullu 2021 (TATOLI)-Inan-faluk ho kondisaun defisiénsia, Teresinha Gusmão (48),  hetan ona apoiu nesesidade báziku hosi Rotarack Club  Of Covalima.

“Hafoin akompaña  publikasaun notísia hosi Agência Tatoli kona-bá inan-faluk  Teresinha Gusmão nia kondisaun ne’ebé laiha ai-han, halo ami fuan moras. Ha’u hato’o ba ami nia grupu hodi deside hamutuk fó apoiu,”  prezidente  ROCCOV, Júlio Arlindo Guterres,  ba jornalista iha Aldeia Lê-la, Covalima, sesta ne’e.

Inan-faluk Teresinha Gusmão, agradese  ba Rotarack Club  Of Covalima ne’ebé fó ona apoiu nesesidade báziku.

“Ha’u kontente hetan apoiu hosi Rotarack Club  Of Covalima, nune’e ha’u bele aguenta ona hodi han,” Teresinha Gusmão hateten ho matan-been.

Teresinha Gusmão ho nia-oan na’in-ualu (8) no nia aman ne’ebé terseira idade ona aguenta de’it ai-han, hanesan kulu ho guavas-fuan hodi bele aguenta moris.

Inan-faluk defisiente Teresinha  Gusmão, hela iha Aldeia Lêla, Suku Holpilat, Postu Administrativu Maukatar, Munisípiu Covalima.

Apoia fasilidade ospitál ba SSM

Iha sorin seluk, klube voluntáriu Rotarack Club  Of Covalima (ROCCOV)  apoiu ekipamentu  ba servisu saúde munisipál (SSM)

Molok distribui fasilidade ba servisu saúde munisipál , ROCCOV mós apoiu ona nesesidade bázika ba família vulneravel 45.

Fasilidade ne’ebé klube ne’e apoiu  maka  hanesan  manta ho lensól kaixa ualu (8) nune’e SSM sei distribui ba sentru saúde no postu saúde sira iha Munisípiu Covalima.

Diretór Servisu Saúde Munisipál, Filipe Pereira Lemos apresia ba Rotarack Club  Of Covalima apoiu ona fasilidade ba saúde munisipál.

Jornalista       : Celestina Teles

Editór            : Francisco Simões

HAKEREK NO HATÁN

Please enter your comment!
Please enter your name here