Invazaun Indonézia mai Timor-Leste iha loron 7 dezembru 1975. Imajen AMRT/Mario Carrascalão/FMS

DILI, 16 jullu 2021 (TATOLI)-Iha ámbitu komemorasaun loron Centro Nacional Chega ba da-IV ne’ebé liga ho papél Ministériu Justisa (MJ) kona-ba reparasun vítima 1975-1999 mak MJ asesu justisa ba sidadaun sira.

Notísia Relevante : CNC selebra aniversáriu ba dala-IV

Diretora Jerál Administrasaun Polítika Justisa, Marcelina Tilman da Silva hateten, Ministériu Justisa dezempeña papél ida ne’ebé krusiál iha konsolidasaun ba pás no Estadu Demokrátiku no hakbesik asesu justisa ba sidadaun-sira, garante sistema justisa ida ne’ebé efikásia, kria ambiente ida ne’ebé seguru hodi sustenta dezenvolvimentu sosiál no ekonómiku.

“MJ asesu justisa ba sidadaun sira, tanba ho vizaun ida katak dezenvolvimentu sistema justisa iha Timor-Leste (TL) buka atu hetan ba aspirasaun hosi povu TL, nia implika koordenasaun hosi órgaun setór justisa nian, hahú hosi vizaun komún ida  oinsá mak atu sai, oinsá mak funsiona justisa no oinsá mak atu fahe ba malu, “ita hakarak bai iha ne’ebé” no “oinsá mak to’o ba,” Marcelina Tilman da Silva hateten bainhira sai panelista iha kolókiu nasionál CNC iha salaun CNC, Dili, sesta ne’e.

Nia hatutan, dalan ba justisa valór sentrál hosi sistema justisa iha TL ho ninia konseitu define iha Konstituisaun RDTL, katak sidadaun tomak iha dalan ba justisa hodi define sira-nia direitu no konseitu ne’e bele haree hosi disponibilidade hosi servisu justisa nian.

“Ita fó defeza ba sidadaun-sira ninia direitu ho forma lalais, efikásia no justisa no hosi parte seluk, buka fó komprensaun no fiar ba populasaun kona-ba sistema, atu responde ba “ita hakarak bá iha ne’ebé” no ‘’oinsá mak ita to’o ba” define iha meta  no área temátiku iha planu setór justisa 2011-2030,” nia dehan.

Nia hatutan, relasiona ho tema jerál ba komemorasaun aniversáriu CNC, ba da-IV ne’ebé ho tema “Memoriálizasaun Dalan ba Dignifika Sobrevivente” liga ba papél MJ kona-ba reparasaun vítima funu 1975-1999 ne’e signifika katak, meiu ida hodi rekorda ka relembra no prezerva memória istóriku relasiona ho akontesimentu traumátiku.

“Akontese dezde 1975-1999, ne’ebé ita hotu hatene ema 250 ka 1/3 populasaun TL lakon ninia vida hodi defende direitu umanu, nu’udar direitu fundamentál hodi luta hosu okupasaun Indonézia no ikus hodi restaura ita-nia Independénsia iha 20 maiu 2002,” nia haktuir.

Nia dehan, prosesu enkuadramentu memória sobrevimente iha tempu pasadu mak tenke halo liuhosi kultura no identida hodi fó onra no valoriza sakrifísiu ne’ebé durante halo iha tempu naruk, presiza divulga no diálogu kona-ba kestaun kontemporánia hodi involve sidadaun sira.

Tanba memória nia relvánsia nu’udar forma meiu ida oinsá Estadu ka Governu, sosiedade sivíl transforma memória hirak ne’e ba asaun sira.

“Asaun saida mak ita halo hodi dignifika sobrevivente sira ka vítima 1975-1999, MJ liuhosi Diresaun Jerál Administrasaun Polítika Justisa iha loron 08 jullu 2019, asina nota entendimentu ho CNC memória esperansa ho MJ kona-ba implementasaun rekomendasaun relatóriu Chega no Memoriam ad Spem, relasiona ho área solidariedade ba sobrevivente-sira,” nia hateten.

Nia afirma, iha área solidariedade ba sobrevivente-sira mak programa reunifikasaun labarik lakon, halo advokasia ba labarik oan-sira hosi vítima violasaun seksuál iha tempu pasadu, bela hetan dokumentu prova nasionalidade (Sertidaun RDTL), advokasia ba ratifikasaun konvensaun ema lakon, no área memoriálizasaun kona-ba enkuadramentu legál protesaun sítiu istóriku iha territóriu TL tomak.

“Objetivu hosi asina nota entendimentu hosi parte sira ne’e hodi dezeña no implementa atividade sira ne’ebé haktuir iha rekomendasaun Comissão de Acolhamento Verdade e Reconciliação  (CAVR)-Chega” no Comissão da Verdade e Amizade (CVA) nian bá setór justisa nian iha ámbitu fortalesimentu institusionál no dezenvolvimentu polítika, no mós programa MJ liga ho rekomendasaun Chega, no Per Memoriam Ad Apem,” nia hateten.

Nia esklarese, iha parte fortalesimentu institusionál ne’e hamutuk neen mak hanesan, parseria hodi fó asisténsia tékniku entre parte sira, fornese asesu dokumentu (sertidaun RDTL) ba oan-sira ne’ebé mak hetan hosi rezultadu violasaun seksuál iha pasadu.

Parte sira servisu hamutuk hodi fó apoiu ba programa buka ema lakon, no hodi dudu prosesu estabelese Komisaun Nasionál ida hodi buka ema lakon.

“Ita fó apoiu ratifikasaun konvensaun ema lakon ka dezaparesidu (Internasionál Convention for the Protetion of all persons Enforced Disappearance) no implementa bainhira hetan ratifikasaun ona,” nia dehan, nune’e mós servisu hamutuk hodi implementa rekomendasaun hosi Committee Against Torture (CAT).

“Ita apoiu ba dezenvolvimentu enkuadramentu legál ba prezervasaun lokál ka fatin istóriku iha Timor laran tomak tuir regra reabilitasaun no konvensaun, nune’e parseria fó apoiu tékniku ba formasaun sira iha área justisa tranzisional liuliu kona-ba chega no Per Memoriam Ad Spem ba funsionáriu sira iha MJ no Sentru Formasaun Jurídika no Judisiária,” nia hateten.

Kona-ba enkuadramentu legál ba protesaun sítiu istóriku iha territóriu TL, Ministériu Justisa dezenvolve ona pakote lei komplementár hodi implementa lei númeru 13/2017 05 maiu juñu, kona-ba rejime espesiál definisaun titularidade bem imóvel.

Nia hatutan, lei númeru 13/2017 05 maiu juñu, ne’e rekoñese prioridade komunnitária no zona protesaun komunitária nune’e mós MJ sei servisu hamutuk ho CNC, hodi dezenvolve hamutuk enkuadramentu legál hodi define no prezerva sítiu istóriku iha TL.

“Liuhosi asaun ida-ne’e demonstra katak ita dignifika no fó onra ba ita-ninia sobrevivente sira seluk hodi buka tuir, nafatin karik sei iha vítima sobrevivente sira balun mak seidauk hetan ninia direitu,” Marcelina Tilman da Silva hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here