Kampus IOB, Fomento, Dili. Imajen/IOB

DILI, 16 jullu 2021 (TATOLI)–Ministériu Finansa (MF) realiza ona pagamentu izensaun propina ba estudante ensinu superiór ho totál pagamentu millaun $5,6.

“Totál númeru estudante ensinu superiór ne’ebé hetan benefísiu hamutuk 64.619 iha Instituisaun Ensinu Superiór (IES) hamutuk 18,” refere nota hosi MF ne’ebé Agência TATOLI asesu iha sesta ne’e.

Pagamentu ne’e realiza hafoin Ministériu Ensinu Superiór, Siénsia no Kultura (MESKK) halo alterasaun entendimentu ho IES sira kona-ba propina ba estudante.

IES públiku no privadu sira ne’ebé hetan pagamentu mak hanesan, Dili Institute of Technology (DIT), East Timor Coffee Institute (ETCI), Institute of Business (IOB), Instituto Boaventura Timor-Leste (IBTL), Instituto Católico Formação de Professores (ICFP), Instituto Ciências da Saúde (ICS), Instituto de Ciências Religiosas (ICR), Instituto Filosófico S. Francisco de Sales (IFFS).

Nune’e mós, Instituto Politécnico de Betano (IPB), Instituto Profissional de Canossa (IPDC), Instituto S. João de Brito (ISJB), Instituto Superior Cristal (ISC), Instituto Superior de Filosofia e Teologia (ISFIT); João Saldanha Institute (JSI), Universidade de Díli (UNDIL), Universidade de Paz (UNPAZ), Universidade Nacional de Timor Lorosa’e (UNTL), no ikus liu mak Universidade Oriental Timor Lorosa’e (UNITAL).

Kompleta rekezitu atu fó subsídiu internet ba estudante

Relasiona ho subsídiu internet ba estudante ensinu superiór sira, MESKK sei kompleta rekezitu ba operadór telekomunikasaun sira hanesan Timor Telecom, Telemor no Telkomcel hodi submete filafali ba MF, nune’e iha tempu badak nia laran sei verifika molok realiza pagamentu.

Iha fulan-maiu 2021, Prezidente Repúblika promulga ona Lei Orsamentu Jerál Estadu (OJE) Retifikativu, ne’ebé lori mudansa iha dotasaun orsamentál lubun ida inklui dotasaun Fundu COVID-19, ne’ebé ho montante inísiu millaun $31, hetan ona reforsu millaun $256,6 nune’e ninia totál hamutuk millaun $287,6.

Mudansa iha dotasaun Fundu COVID-19 ne’e, fó biban ba Governu hodi finansia medida sosio-ekonómiku sira inklui izensaun pagamentu propina no subsídiu internet ba estudante ensinu superiór.

To’o iha loron 16 jullu 2021, Fundu Espesiál COVID-19 nia ezekusaun reál atinje ona millaun $94,1 ka 33% hosi totál orsamentu alokadu millaun $287,6.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here