Abertura formasaun JOVET iha Restaurante Jelriany, Metiaut, sesta (16/07). Imajen TATOLI/Natalino Costa

DILI, 16 jullu 2021(TATOLI)—Joven iha Veterinária (JOVET) realiza formasaun intensivu durante loron tolu, hahú loron 16 to’o 18 jullu, ba joven hodi hasa’e kapasidade no iha esperiénsia iha área veterinária.

Tuir Koordenadór JOVET, Abrão Pereira, inisiativa formasaun ne’e tanba nota katak bainhira joven sira ramata estudu, sempre hasoru difikuldade atu tama kampu traballu tanba kestaun esperiénsia.

“Hanesan barreira boot maka falta esperiénsia serbisu, tanba esperiénsia serbisu ne’e la aprende iha universitáriu. Tanba ne’e, realiza formasaun ho materiál foka liu ba atendimentu animál iha kampu,” Koordenadór hateten durante abertura formasaun JOVET, ne’ebé hala’o iha Restaurante Jelriany, Metiaut, sesta ne’e.

Abertura formasaun JOVET iha Restaurante Jelriany, Metiaut, sesta (16/07). Imajen TATOLI/Natalino Costa

Formasaun ne’e loloos atu kapasita joven hamutuk na’in-70, maibé tanba limitasaun fatin entaun limita ba ema na’in-10.

Iha futuru, atividade hanesan sei kontinua, ne’ebé formasaun ne’e envolve joven sira ramata ona estudu iha universidade departementu veterinária hosi Universidade Nacional Timor Lorosa’e (UNTL) no Universidade Oriental Timor Lorosa’e (UNITAL).

“Intensaun formasaun ne’e atu kria oportunidade ba joven sira ne’ebé ramata estudu iha universitáriu no mai iha organizasaun atu dezenvolve sira-nia abilidade hodi hala’o serbisu iha kampu,” nia akresenta.

Enkuantu JOVETakumula membru 100, ho knaar kria oportunidade ba joven sira ne’ebé gradua ona iha área veterinária.

Ba kestaun n’e, Estadu Unidu Amérika (EUA) liuhosi Embaixada iha Timor-Leste apoia osan ho montante $2.000 ba formasaun JOVET.

Embaixadór EUA iha Timor-Leste, Kevin Blackstone, nota katak durante ne’e ema ne’ebé tau-matan ba animál iha nasaun ne’e oituan, tantu ba animál fuik no hakiak iha uma.

“Tanba ne’e, ami prontu fó apoia ba área ida-ne’e, ein termu rekursu umanu atu dezenvolve área ne’e di’ak liután,” Diplomata ne’e subliña.

Jornalista : Natalino Costa

Editora      : Julia Chatarina

HAKEREK NO HATÁN

Please enter your comment!
Please enter your name here