Ministru Turizmu, Komérsiu no Indústria, José Lucas do Carmo da Silva. Imajen TATOLI/Egas Cristóvão

DILI, 15 jullu 2021 (TATOLI)--Ministru Turizmu, Komérsiu no Indústria, José Lucas do Carmo da Silva do Carmo, konsidera implementasaun programa Cesta Bázika fó benefísiu ba no empreza nasionál sira.

“Implementasaun Cesta Bázika iha efeitu di’ak ba populasaun atu hetan lalais ai-han no motiva agrikultór sira hasa’e produsaun no salva no proteje empreza sira atu funsionamentu ekonomia rai laran kontinua la’o iha ámbitu COVID-19,” Ministru José Lucas, hateten ba Agência TATOLI, iha Palásiu Governu, kinta ne’e.

Tuir diploma Ministeriál konjuta númeru 48/2020, 07 outubru, kona-ba medida atribuisaun Cesta Bázika, operadór ekonómiku lokál iha ámbitu planu rekuperasaun ekonómika ho  rejime espesiál aprovizionamentu ba feitu, iha ártigu 10, temi akizasaun produtu Cesta Bázika ba modalidade ajudiksaun direita to’o limite verba ne’ebé aloka ba entidade ajudikasaun ne’ebé ministériu indika.

Nune’e, MTKI kontrata empreza hamutuk 76-resin ho kustu orsamentu millaun $34 hodi  partisipa ba programa Cesta Bázika liuhosi sosa no distribui produtu, ho modalidade voucher ba benefisiáriu hamutuk 287.770 iha postu administrativa haat iha munisípiu Dili no iha área urbana sira.

“Ai-han sira ne’ebé distribui sosa hosi agrikultór lokál, nune’e bele insentiva kuda no promove produtu rai-laran hodi responde ba nesesidade no sirkula iha merkadu,” nia akresenta.

Loja sira ne’ebé mak fasilita voucher atu troka ba produtu ai-han no nesesidade bázika hamutuk loja 15 hanesan Amigu to’os-nain, Loja Agrikultor, Jacinto Supermarket, Lita Store, Lisun, Supermarket, Funan Buras, Acelda, Starking, May Mart, Fitun, W four, Maubar no seluk tan.

Nune’e, hahú hosi 14 juñu, benefisiáriu ne’ebé simu ona produtu produtu Cesta Bázika iha territóriu tomak hamutuk millaun 1,3 resin ka reprezentante 91,8% hosi totál benefisiáriu millaun 1,5.

“Ita bele dehan distribuisaun kuaze konlui ona, maibé karik iha lista balun hosi Ministériu Administrasaun Estatál (MAE) liuliu reklamante sira bele rezolve ona atu finaliza iha jullu ne’e,” nia hatutan.

Nune’e, Parte MTKI halo ona Commitment Payment Voucher (CPV)  ba empreza hamutuk 67  ne’ebé fornesedór 100% mak kumpre devér selu impostu redimentu ba Autoridade Tributária, ne’ebé Ministériu Finansa halo ona pagamentu hamutuk millaun $21,3 no seluk sei iha prosesu

Programa Governu ba kurtu prazu iha ámbitu rekuperasaun ekonómika, nu’udar medida restrisaun iha luta kontra surtu COVID-19 hodi salva no proteje funsionamentu ekonómia rai-laran.

Tanba ne’e, Governu deside altera dekretu-lei númeru 48/2020, loron 07 outubru, halo distribuisaun programa Cesta Bázika iha ámbitu rekuperasaun ekónomiku ba kurtu prazu, ho objetivu atu fó apoiu nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Insiativa ne’e ho objetivu hodi kria kondisaun liuhosi aumenta redimentu agrikultór, inklui apoia família  ho nesesidade bázika hodi komnate hamlaha liuhosi kontribuisaun ai-han ne’ebé iha nutrisaun ba uma-kain hotu iha Timór laran.

“Ita haree motiva duni povu agrikultór atu hasa’e produsaun ai-han iha rai-laran tanba dadaun povu agrikultór hahú halai natar no toos sira ne’ebé abandonadu,” Ministru nota.

Benesiáriu husu kontinua implementa Cesta Bázika

Benefisiária Cesta Bázika, iha área Rai-kotu, Suku Comoro, Munisípiu Dili, Angelita da Conceição, husu ba Governu atu kontinua implementa programa Cesta Bázika tanba iha situasaun difísil bele hetan ai-han lalais atu konsumu.

“Ami husu atu Governu kontinua implementa programa ne’e, maibé presiza mós mellora implementasaun liuliu sasán sira nia folin,” nia sujere.

Nune’e, nia agradese ba Governu liuliu MTKI tanba fasilita voucher hodi sira bele hili ai-han-sira iha loja sira hodi bele konsumu ho família.

Benesiáriu iha suku Bekora, Dili, Jorge Nelson, husu  kontinuasaun programa ne’e, maibé ai-han sira di’ak liu uza produtu lokál atubele motiva mós povu agrikultór atu hasa’e produsaun.

“Ita hakarak kontinua tanba daudaun ne’e povu agrikultór sira-nia produtu folin, hanesan meiu ida hasa’e povu nia vontade ba halo natar no to’os,” nia argumenta.

Hatan ba kestaun ne’e, tuir Ministru José Lucas, Ministériu Koordenadór Asuntu Ekonómiku (MKAE) mak tenke aprezenta ba Konsellu Ministru atu foti desizaun atubele kontinua ou labele kontinua.

“Ita haree tanba hetan ai-han lalais, nune’e, iha implementasaun ne’e iha komentáriu hosi benefisiáriu sira barak no husu atu Governu kontinua programa Cesta Bázika, ita anota maibé presiza iha diskusaun iha nível Konsellu Ministru,” nia subliña.

Empreza lokál 232 partisipa iha Cesta Bázika

Governu liuhosi ministériu implementadór sira kontrata kompañia hamutuk 232 atu fornese  Cesta Bázika ba populasaun tomak iha territóriu ho kustu pagamentu hamutuk millaun $82.

Iha fulan marsu to’o inisíu jullu 2021, MF realiza ona pagamentu Cesta Bázika (faze I no II hamutuk millaun $41,2.

Foin lalais, MF aprova ona CPV foun Cesta Bázika hamutuk 108, kompostu hosi MTKI iha CPV 67 ho montante milaun $21,3, kompostu hosi Sekretária Estadu Kooperativa (SEKoop) iha CPV 17 ho montante milaun $7,9 ho Ministériu Agrikultura no Peskas (MAP) iha CPV 24 ho montante $29.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here