Sekretáriu Estadu Arte no Kultura, Teófilo Caldas, harii plaka atu konstrui sentru kulturál iha Villa nova, Baucau, kuarta (14/07). Imajen TATOLI/Natalino Belo

BAUCAU, 14 jullu 2021 (TATOLI)–Sekretáriu Estadu Arte no Kultura (SEAK), Teófilo Caldas, hateten, fulan oin tékniku sira sei halo levantamentu dadus, tanba ne’e husu autoridade tomak atu kontribui kolabora no koopera hodi konstrui sentru kulturál iha munisípiu Baucau.

“SEAK konsisténsia no iha kompromisu atu kontinua halo obra, tanba ne’e fulan oin tékniku sira hahú ona mai halo levantamentu dadus no estudu viabilidade, ne’ebé presiza tulun hosi autoridade suku, postu, Prezidente Autoridade Munisipál (PAM) inklui Polísia Nasionál Timor-Leste (PNTL),” Sekretáriu Estadu hateten bainhira harii plaka iha rai atu harii sentru kulturál, iha Villa  nova, Baucau, kuarta ne’e.

Plaka atu harii sentru kulturál, iha Villa nova, Baucau. Imajen TATOLI/Natalino Belo

Plaka ne’e monta iha rai ho medida 49×140 m² hodi konstrui sentru kulturál, ne’ebé hanesan fatin ida atu halibur diversidade kulturál hotu iha rejiaun parte leste ne’e.

Tanba ne’e, objetivu halo levantamentu dadus tanba sei lori ba defende verba ne’e iha Komité Revizaun Orsamentu Polítika (KROP) tinan 2022.

“Ha’u husu entidade relevante ne’ebé la marka prezensa iha ne’e, bainhira halo dezeñu detalladu, husu bainhira tau ninia kakuluk tenki iha símbulu uma lulik hosi munisípiu Baucau, entaun ita boot sira dezeña postu hirak iha Baucau tama hotu, tanba sai sentru tenki reprezenta hosi uma lisan hosi postu hirak ne’e hotu,” nia akresenta.

Sentru ne’e sei sai merkadu tradisionál permanente atu fa’an tais ho objetivu kultura, halo atividade kulturál kategoria temporál hanesan festivál, espozisaun, kompetisaun múzika no dahur no iha muzeu kulturál atu halo konservasaun eransa kulturál ne’ebé beala sira husik hela.

Sekretáriu Estadu Arte no Kultura, Teófilo Caldas, Autoridade munisipál, postu no suku, reprezentante CCLN munisípiu Baucau, hamutuk PNTL foto hamutuk hafoin harii plaka iha fatin konstrusaun sentru kulturál, iha Villa nova, Baucau, kuarta (14/07). Imajen TATOLI/Natalino Belo

Benefísiu hosi sentru kulturál barak liu ba komunidade sira, ne’ebé hosi postu admistrativu sira sei fó espasu atu fa’an sasán kulturál inklui bainhira hahú konstrusaun sei rekruta traballadór no seguransa hosi komunidade iha área sentru kulturál.

“Vizitante sira bainhira halo vizita no sosa produtu, nia benefísiu sei ba nafatin komunidade,” nia garante.

Tuir Sekretaria Estadu, polítika VIII Governu nia mak apoia grupu kulturál sira hanesan parte dezenvolve kultur ne’ebé kompostu hosi grupu kultura kontemporál, klásiku no grupu indústria kreativa kulturál.

Sentru kulturál sei sai uma lisan

Iha fatin hanesan,PAM Baucau, Olívio ‘Bou Lesa’ Freitas, hateten bainhira konstrusaun sentru kulturál finaliza ona, sei sai uma lisan boot iha rejiaun ne’e.

“Kuandu harii ona signifika katak postu admistrativu neen nia uma lisan tama hotu iha ne’e, tanba sasán lulik ne’ebé ita-nia beala sira uza, husik hela ba ita no sei extradisaun iha fatin ne’e,” nia dehan.

Nia konsidera, bainhira harii ona plaka, signifika rai refere partense ona ba Sekretaria Estadu Arte no Kultura (SEAK) hodi hein konstrusaun, tanba ne’e nia parte husu atu autoridade suku inklui entidade relevante atu informa tutan atu evita ema ruma utiliza rai ba interese privadu.

“Nu’udar sidadaun, ha’u iha responsáblidade atu informa katak rai ne’e nia na’in mak SEAK ona, agora hein orsamentu atu kontrui sentru kulturál Olívio akresenta.

Seremónia ne’e partisipa hosi PAM, Olívio ‘Bou Lesa’ Freitas hamutuk ho Admistradór postu no suku inklui Komandante PNTL munisípiu Baucau, Armando Monteiro no Sekretáriu Jerál Konsellu Munisipál Kombatente Libertasaun Nasionál Baucau, Manuel ‘Alari’ da Costa Soares.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here