Ministru Prezidénsia Konsellu Ministru, Fidelis Maunel Leite Magalhães. Imajen Tatoli/Francisco Sony

DILI, 14 jullu 2021 (TATOLI)–Governu liuhosi reuniaun Konsellu Ministru (KM) aprova proposta ne’ebé aprezenta hosi Ministru Agrikultura no Peska (MAP), Pedro dos Reis, ba autorizasaun abertura prosedimentu  aprovizionamentu konkursu públiku ba akizisaun ró peska industriál rua ho kapasidade 250 GT ba kada ró.

“Antes ne’e Konsellu Ministru aprova ró rua ho kapasidade 150 GT kada ró ne’e invalidu,” Ministru Prezidénsia Konsellu Ministru, Fidelis Manuel Leite Magalhães, hateten, hafoin ramata reuniaun ezekutivu, iha Palásiu Governu, kuarta ne’e.

Hafoin tékniku MAP halo avaliasaun ba kondisaun tasi, nota katak sei iha difikuldade bainhira tama ho ró ho kapasidade kiik, tanba ne’e maka reaprezenta fali proposta ho kapasidade boot.

Tuir Portavóz Governu, akizasaun ró hirak ne’e hakarak kontribui ba dezenvolvimentu iha setór peska nasionál, ho objetivu prinsipál atu hasa’e kuantidade ikan.

Aleinde ne’e, bele hamenus presu ikan iha merkadu nasionál, hapara peska ilegál no asegura utilizasaun rekursu peskueiru ho forma responsável no sustentável ba futuru.

Antes ne’e, Sekretáriu Estadu Peska (SEP) propoin ró peska hamutuk 110 atu sosa iha tinan 2021 nia laran.

Governu konsege sosa ró ba peskadór hamutuk unidade 38, ne’ebé destaka ba munisípiu 10, kompostu hosi Lautém tolu, Baucau neen, Manatuto ida, Same ualu, Ainaro rua, Dili sanulu, Liquiçá ida, Bobonaro hitu, enkuantu Suai no Viqueque maka seidauk distribui.

Polítika SEP tinan 2021 maka kontinua nafatin fó prioridade ba peskadór iha munisípiu sira, ne’ebé kada munisípiu sei hetan ró 10, maibé Aileu no Ermea mak sei la hetan tanba laiha tasi.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here