DILI, 13 jullu 2021 (TATOLI)–Ajénsia Nasionál Lisensiamentu Ambientál (ANLA) durante fulan-neen tinan ne’e nia laran atribui ona lisensa ambientál ba empreza 80 ne’ebé hala’o atividade negósiu no konstrusaun iha Timor-Leste.
“Ita aplika Estadu Emérjensia no Serka Sanitária, maibé ANLA hala’o nafatin knaar hodi atribui lisensa ambientál, hahú janeiru to’o ohin konsege atribui ba empreza hamutuk 80,” Prezidente ANLA, António Lelo Tasi, hateten, iha otél Hilton Dili Palms Spring, Fatuhada, tersa ne’e.
Lisensa ambientál ne’ebé atribui maioria lisensa ho kategoria C, hanesan restaurante, karpinteiru no ofisina no kategória B, ba konstrusaun infraestrutura sira hanesan ETO Tower no seluk tan no ba kategória A mak hanesan empreza Heineken.
Prezidente ANLA esplika, hosi totál ne’e iha empreza 30 halo asesmentu iha ANLA no barak liu projetu Governu nian liuhosi Ministériu Obra Publika (MOP) liuliu ba projetu ponte, estrada no bee-moos.
“Ami nia ekipa ANLA hala’o hela asesmentu hodi nune’e bele atribui lisensa sira ne’e,” nia akresenta.
ANLA atribui lisensa ambientál ne’e bazeia ba dekretu-lei númeru 5/2011, iha anexu ida no rua iha ne’ebá rekere ona katak atribuisaun lisensa ambientál ba projetu ida ne’ebé bele tama kategoria A, B no C.
Tuir dekretu lei númeru 5/2011, ne’ebé públiku iha loron 09 fevereiru, kona-ba lisensiamentu amientál, hosi tabela klasifikasaun kona-ba projetu ho kategoria A mak setór mineiru, indústria, petrólifera, enerjia, indústria transporte, konstrusaun sivíl, saneamentu, bee, agríkola, pekuária, Floresta, turizmu, defeza, seguransa no fatór lokalizasaun.
Klasifikasaun ba projetu ho kategoria B mak indústria, trasnporte, konstrusaun sivíl, saneamentu, bee, agríkola, pekuária, floresta, turzimu, defeza no seguransa.
Jornalista : Florêncio Miranda Ximenes
Editora : Julia Chatarina