Ministériu Obra Públika, Salvador Eugênio Soares dos Reis Pires. Imajen/MOP

DILI, 13 jullu 2021 (TATOLI)—Ministériu Obra Públika (MOP) daudaun ne’e koopera ho entidade relevante atu buka solusaun ba polémika funsionáriu Diresaun Jerál Água no Samenatu (DGAS, sigla portugés) hamutuk 196.

“Ha’u-nia ekipa Diresaun Jerál Administarsaun no Finansa, liuliu Diresaun Nasionál Rekursu Umanu kolabora ho Bee Timor-Leste, Empreza Públika (BTL, E.P) no Komisaun Funsaun Públika (KFP) atu buka solusaun tanba funsionáriu 30-resin mak ita hetan ona solusaun maibé restu ita kontinua hela buka fatin atu kolaka sira ba,” Ministériu Obra Públika, Salvador Eugênio Soares dos Reis Pires hateten iha Hotel Novo Turismo, Bidau Lecidere, tersa ne’e.

Tuir nia, iha reforma institusionál hatudu katak BTL, E.P iha ona atonomia administrativa, ne’ebé tuir lei uluk funsionáriu ne’ebé serbisu iha  DGAS ne’ebé tutela ba MOP,  maibé hakarak tama ba empreza estatál tenke liuhosi rekrutamentu.

Tuir Ministru, antes BTL, E.P operasionaliza hanesan empreza públika tuir estatutu orgánika ne’ebé promulgadu hosi Prezidente Repúblika, halo ona sosializasaun liuhosi komisaun instaladór sira ba funsionáriu públiku no kontratadu.

“Ita sosializa katak BTL, E.P operasionaliza sei halo rekrutamentu, entaun funsionáriu públiku  sira konkorre ba vaga maibé kuandu la liu, ne’e nafatin fusionáriu públiku,” nia afirma.

Nia konsidera funsionáriu kontratadu presiza duni konkorre rekrutamentu tuir ezijénsia lei nian.

Tanba ne’e MOP laiha ona diresaun jerál maibé nafatin eziste Diresaun Água no Sanemantu munisipál.

“Ita agora tenta hela atu solusiona ita-nia funsionáriu públiku sira, liuliu ko’alia ho Komisaun Funsaun Públika no BTL, E.P atu destaka sira ba instituisaun Estadu sira maibé tuir lei  kontratadu sira ne’e tenke haree prosesu ida-ne’e no deside,” nia subliña.

Jornalista : Florêncio Miranda Ximenes

Editora    : Julia Chatarina

HAKEREK NO HATÁN

Please enter your comment!
Please enter your name here