Diálogu nasionál konsultasaun seguransa ai-han iha Timor-Leste, iha City 8, Manleuana, tersa (13/07). Imajen TATOLI/Francisco Sony

DILI, 13 jullu 2021 (TATOLI)–Gabinete Apoia Sosiedade Sivíl (GASC, sigla portugés) hamutuk ho Programa Nutrisaun Ministériu Saúde (MS), realiza diálogu nasionál konsultasaun seguransa ai-han molok partisipa iha pra-simeira ne’ebé sei realiza iha rai-li’ur.

Atividade ne’e loke hosi Ministru Agrikultura no Peska (MAP), Pedro dos Reis, ne’ebé reprezenta Primeiru-Ministru (PM), Taur Matan Ruak.

Iha biban ne’e, Ministru rekoñe katak, Timor-Leste menus ai-han, tanba ne’e importasaun ba ai-han boot nafatin reprezenta 40%.

“Ministériu Agrikultura no Peska halo ona esforsu barak atu redús importasaun, iha sorin seluk iha skema irrigasaun barak maibé kanál sira depende ba udan-been. Ba-oin atu redús númeru importasaun tenke tau hanoin hamutuk atu kria sistema di’ak, nune’e bele hasa’e produsaun kada tinan dala-rua,” Ministru Pedro dos Reis hateten, iha ámbitu diálogu nasionál sistema ai-han iha salaun City 8, Manleuana, tersa ne’e.

Nune’e, governante ne’e husu ba partisipante hotu atu halo diskusaun di’ak, nune’e bele hetan pontu importante no lori ba diskute hamutuk iha pra-simeira ne’ebé sei realiza iha Roma no simeira iha Estadu Unidu Amérika (EUA) iha tinan ne’e.

Aborda tópiku haat

Iha fatin hanesan, Koordenadór Gabinete Apoia Sosiedade Sivil (GASC, sigla portugés), Filipe da Costa, hateten, diálogu nasionál hanesan ba dahuluk iha Timor-Leste, ne’ebé partisipa hosi doadór, parseiru implementadór, sosiedade sivíl no entidade relevante sira.

Iha diálogu ne’e ko’alia tópiku importante haat hanesan sistema ai-han, ne’ebé ko’alia kona-ba lala’ok hahú hosi produsaun, ambiente, konsumu, no karaterizasaun ba konsumu.

Ko’alia mós kona-ba nutrisaun liga ba kreximentu la’o oinsá tanba ne’e sei liga ba preparasaun atu partisipa simeira ne’ebé sei halo iha fulan-dezembru 2021 iha Tokyo.

Nune’e mós, ko’alia kona-ba roteiru ba labarik sira ho kondisaun isin krekas, kona-ba planu asaun saida maka sei halo no rona mós hanoin hosi partisipante sira hotu.

Tópiku ikus mak ko’alia kona-ba koligasaun ba merenda eskolár, tanba Timor-Leste halo programa ne’e tinan kleur ona hamutuk ho país seluk, kona-ba koligasaun ho país seluk atu esforsu ne’e bele la’o ba oin nafatin, tanba importante liu mak ko’alia kona-ba prátika di’ak ne’ebé la’o ona no mellora liután.

“Ita-nia sistema ai-han hahú hosi produsaun iha problema barak, kona-ba ambiente produsaun, ita-nia rekursu naturál katak ita-nia rekursu finanseira ba investimentu iha área agrikultura ita sei iha problema lubuk ida. Ita-nia distribuisaun atu ita bele hetan asesu lalais tanba sei iha problema barak, asesu ne’e la’ós de’it ligasaun entre estrada maibé kapasidade kompra sei iha problema barak atu deskute di’ák liután,” Koordenadór subliña.

Ai-han barak estraga

Nota mós katak hahan barak mak estraga, hahú hosi kolleta to’o tau iha meza leten.

Iha mundu, tuir relatóriu hahán besik tonelada millaun ida mak so’e de’it, iha Timor-Leste 37% hosi hahán ne’ebé prodús no han iha meza leten estraga de’it.

Tanba ne’e, Koordenadór GASC konsidera presiza halo diskusaun atubele redús gastu ai-han, liu dalan hasa’e no konserva liután hahán atu nune’e bele sai hosi situasaun inseguransa ai-han.

“Tuir relatóriu ne’ebé iha, ita sei iha populasaun 36% maka iha kondisaun inseguransa ai-han grave, entaun iha de’it 25% mak aihan ne’e seguru, no sira barak liu hela iha Dili, entaun ida ne’e mak sai hanesan problema ne’ebé presiza diskute iha diálogu ida ne’e,” Koordenadór subliña.

Indikadór ne’ebé lansa ona iha livru hanaran konsolida ba seguransa no ai-han nutrisaun ne’e maka hakarak ema ne’ebé menus nutrisaun 24%, tenke redús ba 0%, tanba daudaun ema inseguransa ai-han 36%, nune’e tenke redus ba 0%.

Enkuantu, ema ne’ebé ho ras badak daudaun iha 40%, tanba ne’e ho alvu tenke redús pelu menus 25% to’o tinan 2030 tanba Timór adere ba Objetivu Dezenvolvimentu Sustentavel (ODS) no iha mós Planu Estratéjiku Dezenvolvimentu Nasionál (PEDN) ne’ebé ko’alia katak to’o 2030 ema hotu iha nutrisaun di’ak no ai-han hotu tenke seguru.

Tanba ne’e, Koordenadór konsidera atu bele atinje indikadór ne’ebé define iha PEDN no ODS presiza tau hanoin hamutuk.

Jornalista : Antónia Gusmão

Editora     : Julia Chatarina 

HAKEREK NO HATÁN

Please enter your comment!
Please enter your name here