Hare tasak no besik atu kolleta. Imajen TATOLI/Cipriano Colo

DILI, 13 jullu 2021(TATOLI)—Ministériu Agrikultura no Peska (MAP), tinan ne’e rejita área kultivasaun sa’e iha munisípiu balun, kompara ho tinan kotuk.

“Ita-nia área kultivasaun tinan ne’e sa’e kompara ho tinan kotuk, ita hotu hatene tinan kotuk área kultivasaun sa’e 15% de’it, ne’ebé konverte karik ektare 22.600, maibé tinan ne’e sa’e ba ektare 24.500,” Diretór Jerál MAP, Odete do Ceu Guterres, informa ba jornalista sira hafoin partisipa iha simeira ba ai-han, iha City 8, Manleu, tersa ne’e.

Área espansaun kutivasaun nia barak liu iha munisípiu Baucau no Bobonaro.

“Iha Seiçal, Baucau, ita aumenta área kultivasaun ektare 1.200, Maliana II ektare 1.500 inklui postu administrativu Cailaco, munisípiu Bobonaro,” nia akresenta.

Tanba ne’e, projesaun MAP ba produsaun hare tinan ne’e bele sa’e ba tonelada 90.000 to’o 100.000, karik konverte ba foos bele hetan tonelada 60.000.

Foin lalais, MAP no komunidade halo kolleta hare iha Webaba iha rai ektare 763, hosi rai poténsia ektare 2.073.

Munisípiu Bobonaro iha poténsia rai ektare 700 resin, maibé tinan ne’e sa’e ba ektare 4.743.

Enkuantu, iha munisípiu Baucau, baibain iha de’it área Seiçal ninian, tinan barak nia laran labele halo natar, maibé tinan ne’e área kultiva sa’e to’o ektare 1.000 resin.

Jornalista : Natalino Costa

Editora      : Julia Chatarina

HAKEREK NO HATÁN

Please enter your comment!
Please enter your name here