TIC Timor I.P realiza formasaun ba pesoál informátika, iha salaun Sentru Formasaun Polísia, Comoro, segunda (12/07). Imajen TATOLI/Francisco Sony

DILI, 12 jullu 2021 (TATOLI)Agência Tecnologia de Informação e Comunicação Timor, Institutu Públiku (TIC Timor, I.P) realiza formasaun hodi kapasita ofisiál informátika hamutuk na’in-24 hosi instituisaun Estadu 16 iha área rede, ho tema ‘Interconnection Networks Concept and Configuration Of Network Devices’.

Diretór Ezekutivu TIC Timor, I.P, Roberto Caitano de Sousa Vicente, hateten, objetivu hosi formasaun ne’e atubele fó koñesimentu intermidiáriu to’o avansadu ba pesoál ne’ebé envolve iha área informátika, nune’e bele aplika iha instituisaun idaidak ho responsabilidade hodi bele halo konfigurasaun ba rede, dezeñu no asegura.

Diretór Ezekutivu TIC Timor. I.P, Roberto Caitona de Sousa Vicente. Imajen TATOLI/Francisco Sony

“Objetivu prinsipál hosi formasaun mak hakarak aumenta koñesimentu iha aspetu orizontál ba pesoál iha liña ministériu, nune’e neneik bele alkansa padraun formasaun no bainhira muda hosi ministériu ida ba ministériu seluk, iha ona koñesesimentu kuaze hanesan,” Diretór Ezekutivu TIC Timor, I.P, hateten, hafoin abertura formasaun iha salaun Sentru Formasaun Polísia (CFP, sigla portugés), Comoro, segunda ne’e.

Formasaun ne’e hala’o durante semana rua no matéria ne’ebé fó hosi CISCO, ne’ebé nu’udar espesializada iha área informátika iha nível mundiál no formadór maioria timor-oan.

Formasaun nu’udar papél Governu liuhosi ajénsia teknolojia, ho kompeténsia atu fó asesoria no formasaun pesoál iha instituisaun Estadu no ajénsia autónomu sira.

TIC Timor I.P realiza formasaun ba pesoál informátika, iha salaun Sentru Formasaun Polísia, Comoro, segunda (12/07). Imajen TATOLI/Francisco Sony

“Ba oin, hakarak ka lakohi atubele halo funsaun didi’ak tenke kria padraun ida ba pesoál sira no tenta atu sentraliza rekursu informátika Governu iha fatin ida, se lae dala barak akontese bainhira iha mudansa polítika iha Governu, ita tenke kontinua reinveste osan tanba ita la asegura informasaun Governu iha fatin ida,” nia akresenta.

To’o agora, TIC Timor rejista instituisaun Estadu hamutuk 44 inklui Embaixada neen mak hahú ona uza fasilidade Governu eletróniku no sentru dadus Governu eletróniku.

Antes ne’e, TIC Timor realiza ona formasaun ne’ebé ho partisipante hosi instituisaun Estadu lima maibé agora hasa’e ba 16, inklui númeru partisipante antes ne’e 10 agora sa’e ba 24.

Formandu foto hamutuk Formadór sira hosi TIC Timor I.P, durante formasaun iha salaun Sentru Formasaun Polísia, Comoro, segunda (12/07). Imajen TATOLI/Francisco Sony

TIC Timor harii bazeia ba dekretu-lei númeru 29/2017, loron 02 agostu 2017, ho nia papél prinsipál maka atu sentraliza rekursu informátika Governu no haree ligasaun ba grau polítika informátika, dezenvolve servisu eletróniku sira hodi promove Governu eletróniku, dezenvolve padraun tékniku sira interligadu sistema Governu.

Nune’e mós, haree kona-ba estabelesimentu estudu, dezeñu no dezenvolve implementasaun sistema informátika Governu tomak, inklui ajénsia autónomu sira, dezenvolve mata-dalan ba seguransa, implementasaun eletróniku, fornese apoiu formasaun ba ofisiál Governu no entidade públika sira iha área informátika.

Iha biban ne’e, Diretór Ezekutivu TIC Timor apela ba partisipante sira hotu atu foku no aprende barak, fahe koñesimentu ba malu no hamosu pergunta kuandu la komprende, nune’e bele iha konfirmasaun no hafoin atividade ramata bele aumenta tan koñesimentu tékniku ho espetativa ida katak iha futuru independentemente bele kontinua presta servisu di’ak liu ba idaidak ninia instituisaun Governu.

Formandu Elígio António Ximenes, hosi Institutu Politékniku Betano, agradese ba TIC Timor ne’ebé fó ona oportunidade hodi partisipa iha formasaun ne’e.

Formandu Elígio António Ximenes, hosi Institutu Politékniku Betano. Imajen TATOLI/Francisco Sony

“Agradese tanba fó ona oportunidade mai ami, nune’e bele hatene halo konseitu konfigurasaun rede iha liña ministeriálno hosi atividade ne’e bele aprende barak liután, maski ida-ne’e hanesan dahuluk ba instituisaun, maibé espera katak ho atividade ne’e ami bele aprende buat barak liután kona-ba rede ninian,” nia subliña.

Nune’e, formandu ne’e komprometidu katak ho esperiénsia ne’ebé hetan sei aplika ba instituisaun.

“Antes ne’e iha ami-nia instituisaun rasik iha difikuldade tebes ba rede, tanba bainhira ami atu asesu ba website ruma prosesu kleur tebes, tanba ne’e ohin iha formasaun ami aprende buat barak hodi bele rezove kestaun hirak ne’e,” nia hatutan.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here