Inan-faluk ho kondisaun defisiénsia, Teresinha Gusmão. Imajen Tatoli/Celestina Teles

COVALIMA,  12 jullu 2021 (TATOLI)-Inan-faluk ho kondisaun defisiénsia, Teresinha Gusmão (48),  presiza tebes intervensaun ajuda umanitária tanba daudaun ne’e nia ho nia-oan sira menus ai-han.

Teresinha Gusmão ho nia-oan na’in ualu (8) no nia aman ne’ebé terseira idade ona aguenta de’it ai-han, hanesan kulu ho guavas-fuan hodi bele aguenta moris.

Inan-faluk defisiente Teresinha  Gusmão, hela iha Aldeia Lêla, Suku Holpilat, Postu Administrativu Maukatar, Munisípiu Covalima.

“Ha’u laiha ona ai-han atu han hamutuk ho ha’u nia oan na’in-ualu ho ha’u nia apa. Ha’u nia apa mós katuas ona labele ona atu servisu, nune’e difisil tebes ba ami atu hetan ai-han ho nutrisaun,” Teresinha Gusmão, haktuir bá jornalista-sira iha Aldeia Lê-la, segunda ne’e.

Dadeer  bainhira loro-matan foin-sa’e,  Teresinha ho nia-oan feto daruak buka ai-han, hanesan kulu, guavas-fuan ho ai-farina, atu bele han no  talvés hahán laiha, sira bele aguenta ho bee de’it iha loron tomak nia laran.

Júlia Gusmão, nu’udar oan feto da-ruak hosi inan-faluk Teresinha Gusmão,  ho matan-been haktuir, bainhira laiha ai-han iha uma sira hemu  bee hodi aguenta to’o kalan.

“Ami iha uma laiha ona hahán atu han, ami hateke malu tanis de’it. Ha’u nia ama hanesan feto faluk no mós ema ho defisiente. Difisil tebes ba ami atu hetan ai-han saudavel no nutrisaun,” Júlia Gusmão  konta ho matan-been.

Bainhira jornalista-sira ba konfirma situasaun família Teresinha Gusmão nian ne’e ho Xefe Aldeia Lê-la, Zeferino Verdial, hateten, nu’udar autoridade iha aldeia refere nia hato’o ona bá sosiedade sivíl kona-ba Teresinha Gusmão nia kondisaun moris.

“Ami esforsu no hato’o ba parte relevante, nune’e Teresinha Gusmão bele hetan subsídiu invalidéz nian. Ida-ne’e ami nia esforsu,” Zeferino Verdial hateten.

Jornalista       : Celestina Teles

Editór             : Francisco Simões

HAKEREK NO HATÁN

Please enter your comment!
Please enter your name here