Koordenadór antigu alunu Parlamentu Foin sa'e Timor-Leste (APFTL) munisípiu Baucau, Gabriel Da Piedade Fraga. Imajen TATOLI/Natalino Belo

BAUCAU, 09 jullu 2021 (TATOLI)–Koordenadór antigu alunu Parlamentu foin sa’e Timor-Leste (APFTL) munisípiu Baucau, Gabriel Da Piedade Fraga, hateten, nia parte ho ekipa sei halibur fali maluk joven sira hodi realiza hikas programa tanba Serka Sanitária iha rejiaun ne’e termina ona.

“Ami atu tuur hamutuk fali no halibur joven sira atu fó formasaun, hosi antigu alunu voluntáriamente tamba ami mai ho vizaun ativizmu, sivilizmu no voluntarizmu, ne’ebé hanesan ami-nia motto ne’ebé bele guia atu fó formasaun ba joven sira,” Gabriel hateten ba Agência TATOLI iha Sentru Joventude Baucau, Villa nova sesta ne’e.

Tuir Koordenadór, durante COVID-19 no implementasaun Serka Sanitária iha munisípiu Baucau, difikulta tebes implementasaun programa.

“Atividade paradu tamba pandemia, maski nune’e nafatin halibur hamutuk hosi troka ideia,” nia akresenta.

Aleinde ne’e, Parlamentu foin Sa’e Baucau iha ona meta ba tinan ne’e, sei ba nasionál atu halo programa debate maibé tamba situasaun atuál la permite, entaun inisiativa ne’e la konsege realiza.

Nune’e, antigu alunu sira iha Baucau iha inisiativa rasik kria programa hanesan atividade fahe ajuda umanitária ba inan kbiit laek sira iha ámbitu pandemia hanesan parte asaun karidade no  kolabora hamutuk ho Oxfam no parte koperativa sira hosi motiva joven produtivu liuhosi formasaun ne’ebé inklui mós membru Parlamentu foin sa’e sira ne’ebé seidauk hetan formasaun.

Iha Tinan 2020, Parlamentu foin sa’e inklui APFTL Baucau fó formasaun edukasun sívika hanaran semana kreativa iha suku Samalari ho objetivu fó koñesimentu ba joven sira oinsá atu redús númeru konflitu.

“Entaun ami implementa programa semana kreativa oinsá prodús rasik kreatividade iha suku hodi dezenvolve liután,” Gabriel akresenta.

Parlamentu foin sae hanesan programa hosi Sekretaria Estadu Juventude no Desportu (SEJD) hodi fó espasu joven atu aprende liután liuhosi formasaun edukasaun sívika, public speaking, debate no seluk tan.

Hafoin ramata simu formasaun iha nasionál, membru sira sei fila ba baze atu akumula dadus ligadu ho matéria importante hanesan edukasaun, saúde, dezempregu, no kestaun relevante, nune’e bele elabora hamutuk iha munisípiu hodi kontinua lori ba nasionál atu debate iha plenária no ikus mai sei hamosu rezolusaun ida hodi intrega ba membru Governu sira relasiona ba matéria ne’ebé aborda ona.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here