Kondisaun estrada rurál iha Baucau. Imajen TATOLI/Natalino Belo

BAUCAU, 09 jullu 2021 (TATOLI)–Diretór Obra Públika munisípiu Baucau, Pedro Alexandre Guterres Pereira, hateten, daudaun ne’e iha kompañia hamutuk 23 mak submete ona dokumentu hodi kompete projetu reabilitasaun estrada rúral munisípiu Baucau tinan ne’e.

Diretór Obra Públika munisípiu Baucau, Pedro Alexandre Guterres Pereira. Imajen TATOLI/Natalino Belo

“Ohin ba munisípiu Baucau hamutuk pakote tolu, ida Afasa-uaitame hamutuk kompañia ualu, Venilale-Uaioli iha kompañia 15 kompostu hosi pokote dahuluk neen no pakote daruak sia ne’ebé hamutuk kompañia 23,” Diretór Obra Públika rejionál informa ba Agência TATOLI, iha ninia knaar fatin, sesta ne’e.

Munisípiu Baucau tinan ne’e reabilita estrada rúral hamutuk iha pakote hitu, ho distánsia kilómetru 20,55, iha suku Afasa, Gurusa, Uaitame, postu administrativu Quelicai, munisípiu Baucau pakote haat no iha postu administrativu Venilale ba Uaioli pakote tolu, ho totál kustu ba projeitu ne’e mai hosi fundu infraestrutura hamutuk millaun $4,157.

Diretór kompañia Zomarzo unipesoal.Lda, Marcos Asisis da Costa Belo. Imajen TATOLI/Natalino Belo

Iha fatin hanesan, Diretór kompañia Zomarzo unipesoal.Lda, Marcos Asisis da Costa Belo, hateten, kompañia deside kompete ba projetu reabilitasaun estrada rúral hosi Venilale-Uaioli hodi kontribui ba dezenvolvimentu nasionál.

Responsável kompañia ne’e prontu simu rezultadu maibé importante durante prosesu selesaun to’o finál tuir dalan justu.

Kondisaun estrada rurál iha Baucau. Imajen TATOLI/Natalino Belo

“Ami konkorre iha pakote tolu iha tinan ne’e, bainhira sai vensedór di’ak maibé karik lae tamba kompañia barak mak kompete, importante tuir lei ne’ebé vigór iha Timór no labele iha nepotizmu, ida-ne’e mak ami husu,” nia hatutan.

Prosesu tomak hosi projetu ne’e diretamente lidera hosi Komisaun Nasionál Aprovizionamentu (CNA, sigla portugés), hahú hosi prosesu inísiu to’o finál, ho ninia kustu hosi fundu infraestrutura hamutuk $15.000.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here