Janeiru-juñu, moras IRA domina iha Fatululik
COVALIMA, 09 jullu 2021 (TATOLI)-Dezde janeiru to’o juñu 2021, Sentru Saúde Fatululik, Munisípiu Covalima, rejista númeru moras Infesaun Respiratória Alta (IRA) ho kazu 200-resin.
“Ikus-ikus ne’e komunidade sira la hakbeik ona ba Sentru Saúde tanba sira ta’uk atu swab. Dadus ikus ami iha maka kazu IRA ne’ebé ami rejista ne’e hamutuk 200-resin,” Xefe Sentru Saúde Fatululik, José da Cruz, informa ba Agência Tatoli iha Fatululik, Covalima, sesta ne’e.
Nia hateten, komunidade afeta moras iis ka IRA tanba tempu bailoron halo rai-rahun maka’as no mudansa klimátika.
Pesoál saúde iha Sentru Saúde Fatululik iha ona planu no iha tempu badak sei halo sensibilizasaun ba komunidade atu prevene moras IRA.
Pesoál saúde ne’ebé servisu iha Sentru Saúde Fatululik, kompostu hosi doutór ida, enfermeiru na’in-lima (5) no voluntáriu na’in-hitu (7).
Jornalista : Celestina Teles
Editór : Francisco Simões
