COVALIMA, 09 jullu 2021 (TATOLI)-Pesoál Saúde-sira iha Sentru Saúde Postu Fatululik, Munisípiu Covalima, hahú halo sensibilizasaun ba komunidade kona-bá perigu hosi variante delta.
“Sosializasaun ka sensibilizasaun ne’e hanesan alerta ida ba komunidade hotu atensaun ho kumpre protokolu saúde públiku hodi evita propagasaun surtu Covid foun ka variante delta ne’ebé nakda’et ona mai nasaun viziñu Indonézia,” Xefe Sentru Saúde Postu Fatululik, Munisípiu Covalima, José da Cruz, informa ba Agência Tatoli iha Postu Fatululik, sesta ne’e.
Postu Fatululik nia área jeográfika territoriál terrestre nian fronteira ho viziñu Indonézia, nune’e pesoál saúde tenke kontinua halo sensibilizasaun ba komunidade atu prevene variante delta ne’e.
Administradór Munisípiu Covalima Francisco de Andrade, hamutuk ho servisu saúde Covalima iha ona planu atu halo sensibilizasaun ba komunidade iha área fronteira hanesan Postu Administrativu Famea, Fatululik no Tilomar kona-bá variante delta.
Jornalista : Celestina Teles
Editór : Francisco Simões
