Ekipamentu protesaun COVID-19 ne’ebé tula hosi Aviaun Herkules Nova Zelándia to’o iha Aeroportu Comoro, tersa (23/03). Imajen TATOLI/António Gonçalves.

DILI, 08 jullu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu pozitivu 63, rekoperadu 46 no kazu ativu 904.

“Kazu foun 63 maihosi Dili 43 no munisípiu-sira seluk 20, kompostu hosi mane na’in 32 no feto 31,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, kinta ne’e.

Notísia relevante:COVID-19, pozitivu 46 no ativu 942

Hosi totál kazu detetadu foun ohin, ho idade 12 mai karaik na’in-haat, entre tinan 12-59 na’in 57 (90,4%), idade 60 mai karaik  na’in-rua no 17,4% sintomátiku.

Kumulativu kazu konfirmadu sura hosi 21 marsu 2020 to’o 08 jullu 2021 hamutuk 9.657. Hosi horisehik mai ohin, teste ne’ebé Laboratóriu Nasionál Saúde halo hamutuk 708 PCR, ho detallu hanesan tuir-mai, Vijilánsia sentinela 41, rastreiu ba kontaktu ka Contact tracing 42, Rastreiu Aleatóriu ka Random Screening 17, Viájen sai-hosi serka sanitária hosi Dili 607, Viájen internasionál laiha, Follow up iha kuarentena na’in-ida.

Totál testes PCR ne’ebé halo horisehik iha munisípiu-sira seluk, RAEOA no HNGV hamutuk 333 ho  detalla hanesan tuir-mai, Maubisse 117, Maliana lima, Viqueque tolu, Suai 35,  Baucau 92, Ermera 61, RAEOA 10 no HNGV 10.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 07 jullu tuir sistema informasaun Sáude iha Ministériu Saúde, totál kumulativu doze dahuluk iha Dili 116.345 (54,3%), alende ne’e, totál  kumulativu doze  daruak iha Dili 14.461 (6,76%).

Ema ne’ebé simu ona vasina doze dahuluk iha Timor-Leste 222.138 (29,4%), no sira ne’ebé simu ona doze daruak 26.464(3,51%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 4,1/100 mil abitante, enkuantu ba de’it munisípiu Díli 10,3/100 mil abitante.

Insidénsia iha leten sei nafatin hatudu katak, munisípiu Dili maka fatin ho risku bo’ot liu atu populasaun hetan da’et no hada’et tutan virus SARS-CoV-2.

Informasaun hosi izolamentu

Iha 08 jullu 2021, izolamentu Vera Cruz halo tratamentu ba kazu detetadu na’in 11, Iha área obstetrisia na’in-tolu no iha medisina interna na’in-lima iha sirurjia na’in-tolu. Iha obstetrisia na’in-tolu kategoria leve (mild) hotu. Iha área medisina interna na’in-lima. Ida grave, uza oksijéniu na’in-rua, moderadu na’in-rua leve mild. Sira na’in-tolu iha sirurjia kategoria leve mild hotu.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Apelu

Husu ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira-ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here