Prosesu haloot mate-isin dahuluk ne’ebé mate ho COVID-19, iha Semiteriu Metinaro, tersa (06/04). Imajen Tatoli/Joanico de Araújo.

DILI, 07 jullu 2021 (TATOLI)-Adjuntu Prezidente Autoridade Munisípiu Dili, António Moniz Calao, hateten kona-ba preparasaun ba Semitériu foun Metinaro iha tempu badak Governu sei halo pagamentu ba komunidade ne’ebé na’in ba rai refere.

Nia hatutan, semitériu foun Metinaro hamutuk ektare 12 ne’ebé hosi rai ektare 12 ne’e iha tempu badak nia-laran Governu halo uluk pagamentu ba rai ektare tolu (3) no ektare sia (9) seluk seidauk halo pagamentu tanba rai refere sei disputa hela.

“Semitériu Becusse, daudaun ne’e, atu nakonu ona entaun ita-nia Governu planu ona harii semitériu foun iha Postu Administrativu Metinaro no agora autoridade Munisípiu Dili servisu hamutuk ho Diresaun Terras Propriedade, hato’o ona informasaun ba rai-na’in sira katak, iha tempu badak Governu sei fó indemnizasaun,” António Moniz Calao, informa ba Agência Tatoli iha nia knaar fatin, Matadouro, Dili, kuarta ne’e.

Iha sorin seluk Diretór Jerál Terras Propriedade, Rodrigo Mendonça hateten, kona-ba rai ne’ebé atu uza ba semitériu foun ektare tolu ne’ebé Governu sei fó uluk pagamentu tanba sira hatudu ona evidénsia katak sira na’in ba rai refere, entaun Governu prosesu ona ba Konsellu Administrasaun Fundu Infraestrutura (KAFI) no KAFI rasik mós aprova ona rai nia folin atu selu.

“Rai ektare tolu ne’ebé Governu propoin folin no komunidade aseita folin ne’e mak metru ida $ 12,50 ne’ebé ektare tolu ne’e osan ne’ebé Governu atu selu uluk hamutuk $375.000, tanba Konsellu Ministru aprova agora daudaun ita-nia ekipa tun ba foti dokumentu orijinál rai-nian sira entrega mai ami iha tempu badak nia-laran Governu sei halo pagamentu,” nia hateten.

Nia afirma, rai ektare 12 ne’ebé daudaun atu halo ba semitériu foun ne’e na’in ba rai hamutuk ema-nain 15 ne’ebé daudaun ne’e rezolve uluk mak na’in haat no na’in 11 ida mak seidauk.

Razaun na’in-11 seluk seidauk tanba rai sei disputa hela no komunidade laiha dokumentu ne’ebé komprova katak na’in duni ba rai ne’e entaun terras seidauk konsidera no sei hein konsultasaun hosi komunidade, liurai no kuku sira nune’e bele hatene identidade loloos hosi rai ne’e.
Ne’ebé bainhira buka tuir ba na’in 11 ida ne’e hatudu la’ós na’in ba rai automatikamente rai refere sei tam aba rai Estadu.

Jornalista : Arminda Fonseca

Editór : Francisco Simões

HAKEREK NO HATÁN

Please enter your comment!
Please enter your name here