Koordenadór GASC, Filipe da Costa, entrega pakote maternidade ba inan ne'ebé partu iha fasilidade saúde, iha suku Holarua, postu administrativu Same, munisípiu Manufahi, kuarta (07/07). Imajen TATOLI/Antónia Gusmão

MANUFAHI, 07 jullu 2021 (TATOLI)–Fundasaun Alola hetan apoia finanseira hosi Gabinete Apoia Sosiedade Sivíl (GASC, sigla portugés) hodi fahe pakote maternidade ba inan sira ne’ebé partu iha fasilidade saúde no durante isin-rua badinas ba konsulta.

Koordenadora Programa Inan no Oan Rejiaun II Fundasaun Alola, Albertina de Rosa, hateten, inisiativa ne’e nu’udar prezente hosi GASC liuhosi Fundasaun Alola ba inan sira tanba iha ona konsiénsia hodi ba partu iha fasilidade saúde.

“Pakote maternidade ne’e bele motiva liután inan isin-rua sira, karik atu partu tenke ba iha fasilidade saúde sira hanesan sentru saúde ne’ebé iha no besik. Fundasaun Alola identifika inan sira ne’ebé partu iha fasilidade saúde ne’e liuhosi livriñu durante konsulta,” Koordenadora relata iha ámbitu fahe pakote iha suku Holarua, postu administrativu Same, munisípiu Manufahi, kuarta ne’e.

Tuir Koordenadora, inan sira ne’ebé partu iha uma, maski hetan ajuda hosi parteira sira sei labele simu pakote maternidade.

Maski nune’e, responsável programa ne’e husu hirak ne’ebé la hetan labele laran susar no biban ne’e nafatin enkoraja inan isin-rua atu partu iha fasilidade saúde, nune’e bele hetan asisténsia hosi médiku sira.

“Governu prepara fasilidade saúde hodi fó atendimentu ba públiku, partu iha fasilidade saúde ne’e di’ak nune’e bainhira mosu problema ruma pesoál saúde sira fó kedas atendimentu no vantajen partu iha fasilidade saúde ida maka hafoin partu bebé hetan kedas vasina no hetan akonsellamentu hosi parteira sira nune’e fila ba uma tratamentu ba bebé labele falla,” nia subliña.

Iha fatin hanesan, Ursula Andrade nu’udar inan ida ne’ebé partu iha fasilidade saúde, husu ba feto maluk sira ne’ebé isin-rua kuandu atu partu tenke ba fasilidade saúde.

“Programa Fundasaun Alola di’ak tebes, tanba informasaun barak mak ha’u hetan durante  isin-rua to’o ha’u ba partu iha fasilidade saúde, ha’u kontente tebes tanba partu ho saúde di’ak tebes no hetan tratamentu hosi parteira sira, ha’u-nia oan na’in-tolu ona, oan dahuluk partu iha ospitál, daruak iha de’it uma no datoluk ha’u deside ba partu iha sentru saúde. Ha’u bele dehan atendimentu iha fasilidade saúde nian diferente boot tebes,” Ursula konta tuir.

Nune’e, Ursula apela ba inan isin-rua sira atu ba partu iha fasilidade saúde no tenke fó susu-been inan nian ba bebé hosi moris to’o fulan-neen.

Hirak ne’ebé merese hetan pakote maternidade ne’e partu iha fulan-fevereiru tinan ne’e to’o agora, tanba programa ne’e inisia iha fulan-jeneiru 2021.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here