Prezidente KFP, Faustino Cardoso. Imajen TATOLI/António Goncalves.

DILI, 07 jullu 2021 (TATOLI)—Komisaun Funsaun Públika (CFP, sigla portugés) ne’ebé lidera hosi Faustino Cardoso, kuarta ne’e entrega ona relatóriu anuál 2020 nian ba meza prezidénsia Parlamentu Nasionál (PN).

Prezidente CFP hateten relatóriu anuál ne’e entrega ba Prezidente PN, Deputadu Aniceto Longuinhos Guterres Lopes, maibé seidauk fiksa ba debate plenária, tanba ida-ne’e parlamentu nia kompeténsia. 

“Iha relatóriu ne’ebé hato’o mai Parlamentu Nasionál ne’e konsta hotu prosesu dixiplinár, planu asaun anuál hanesan dezenvolvimentu instituisionál, boa-governasaun no seluk tán,” Prezidente CFP informa ba jornalista sira hafoin entrega relatóriu anuál ba meza prezidensiál, iha uma fukun.

Nia dehan, bainhira PN deside ona data ba debate, sei esplika ho detallu kona-ba progresu sira iha prioridade governasaun no medida prinsipál ne’ebé previstu ona planu asaun anuál 2020 nian.

Maibé tuir ajenda ne’ebé haruka hosi relasaun públiku PN katak, reuniaun líder bankada parlamentár ne’ebé sei realiza iha loron 9 fulan-jullu sei diskute ajendamentu ba aprezentasaun relatóriu anuál 2020 nian. Nune’e ajenda tentativa ne’ebé iha kona-ba aprezentasaun relatóriu anuál 2020 nian sei realiza entre loron 12 no 13 jullu, semana oin.

CFP nia papél mak garante setór públiku ho imparsiál, bazea iha méritu no padraun profisionalizmu ne’ebé aas no integridade, nune’e presta serbisu ho kualidade ba Estadu no ba povu Timor-Leste, halo mós jestaun ho efisiente, efetiva no ekonómika hodi desempeña setór públiku nian.

CFP halo tratamentu justa no adekuada ba funsionáriu públiku, ajente administrasaun públika no traballadór setór públiku, no halo dezenvolvimentu lideransa iha inovasaun iha setór públiku ne’ebé previstu iha Lei númeru 7/2009, 15 jullu, artigu 4.

Prioridade governasaun hosi CFP kompostu hosi bem-estar sosiál, protesaun sosiál no sidadania, inkluzaun, protesaun no solidariedade sosiál. Nune’e mos jestaun no dezenvolvimentu iha Funsaun Públika iha boa-governasaun no jestaun institusionál.

Entretantu, CFP iha medida prinsipál rua kompostu hosi halo jestaun, kontribui ba dezenvolvimentu komisaun nian no promove boa-governasaun (governasaun di’ak), jestaun institusionál no fortalese kapasidade rekursu umanu.

Hosi medida halo jestaun, kontribui ba dezenvolvimentu komisaun nian mak hanesan promove nomeasaun funsionáriu públiku sira, implementa politika insentiva, distinsaun no prémiu sira, halo revizaun no halo promosaun regulamentu foun funsaun públika nian, avaliasaun ba dezempeñu.

Planeamentu ba forsa traballu iha setór públiku, halo mapeamentu funsionáriu sira ho defisiénsia (inkluzaun), halo investigasaun ba prosesu disiplinár, halo prosesamentu pedidu pensaun reforma obrigatária, halo diseminasaun informasaun kona-bá lejizlasaun komisaun nian no manuál operasionál.

Entretantu Orsamentu Jerál Estadu iha tinan fiskál (OJE) 2020 ba CFP ho montante $2,395,499. Hosi montante orsamentu ne’e prevee ba programa ho kódigu 419 jestaun no dezenvolvimentu Funsaun Públika $1,945,580, no programa ho kódigu 510 kona-ba boa-governasaun no jestaun institusionál $449,919.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here