Sekretáriu Estadu Protesaun Sivíl (SEPS), distribui materiál konstrusaun ba vítima dezastre naturál hamutuk uma-ka’in 98, iha munisípiu Viqueque, tersa (06/07/21). Imajen Tatoli/Vitorino Lopes da Costa.

VIQUEQUE, 06 jullu 2021 (TATOLI)—Sekretáriu Estadu Protesaun Sivíl (SEPS), distribui ona materiál konstrusaun ba vítima dezastre naturál hamutuk uma-ka’in 98, iha munisípiu Viqueque.

SEPS, Joaquim Gusmão, hateten durante ne’e Governu serbisu hamutuk ho Care Internasional, Adrad no administrasaun munisípiu Viqueque hodi identifika vítima desatre naturál, iha munisípiu ne’e.

Notísia relevante:PNDS Viqueque kapasita EJS na’in 15

“Materiál rekoperasaun dezastre naturál ne’e tarde tanba iha 2020 ita la iha orsamentu. Tanba ne’e, agora ita foin distribui materiál ba konstrusaun uma nian ba família-sira ne’ebé uma hetan estragu hosi 2019 no 2020. Sira ne’ebé afetadu iha tinan 2021 sei iha faze tuir-mai,” Joaquim Gusmão, hateten.

Materiál konstrusaun ne’ebé SEPS oferese iha kategoria tolu mak hanesan, uma aat totál, aat kamán no aat naton.

Governante ne’e husu ba família afetadu-sira ne’ebé to’o oras-ne’e seidauk rejistu sei iha oportunidade atu rejistu hodi submeta ba SEPS atu bele hetan apoiu.

Iha fatin hanesan, Adiministradór Munisípiu Viqueque, Januário Soares “Bolly” agradese ba SEPS ne’ebé marka prezensa hodi distribui materiál ba vítima dezastre naturál iha Viqueque.

“Agradese ba Governu tanba tulun ona família afetadu-sira hodi hadi’a fila-fali sira-nia uma ne’ebé hetan estragu,” nia agradese.

Ohin, SEPS distribui uluk ba vítima-sira hosi postu adiministrativu Viqueque, no tuir planu aban sei distribui ba postu administrativu Lacluta, Ossu, Uatucarbau no Uatulari.

Dadus vítima dezastre naturál hosi tinan 2019 no 2020, iha munisípiu Viqueque kompostu hosi postu administrativu lima, mak hanesan Postu administrativu Viqueque Villa uma-ka’in 44, Ossu uma-ka’in 12, Lacluta uma-ka’in 10, Uatulari uma-ka’in 24 no Uaticarbau uma-ka’in ualu ho totál 98.

Vítima dezastre naturál, António de Jesus, sente kontente no agradese ba Governu ne’ebé fó ona materiál konstrusaun uma-nian hodi hari’i hikas uma ne’ebé hetan estragu hosi dezastre naturál iha tinan kotuk.

Materiál rekoperasaun ba dezastre naturál tuir kategória sira husi uma aat total maka hetan kalén 50, semente saka 25, arrame kesi besi rolu rua, pregu 12cm kg ida, pregu 7cm kg haat, besi 12mm lolon 10, 7mm lolon 10, no osan mão de obra $360.

Uma ne’ebé aat kamán no natón simu kalén no peregu 7cm no osan mão de obra $150, hodi vítima sira hadi’a sira-nia uma.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here