Diretora PNDS munisípiu Baucau, Amélia Maria Viegas. Imajen TATOLI/Natalino Belo

BAUCAU, 06 jullu 2021 (TATOLI)–Diretora Programa Nasionál Dezenvolvementu Suku (PNDS) munisípiu Baucau, Amélia Maria Viegas, hateten, daudaun ne’e suku sira hahú implementa konstrusaun Uma Kbiit Laek.

“Ita implementa dala-ida iha postu neen suku 59, ida-ne’ebé prosesu kotasaun hotu, asina kontratu ramata, no avaliasaun hotu, ita bele hahú konstrusaun no hatama ona matéria konstrusaun ba fatin projetu konstrusaun hodi hahú la’o, la signifika tenki hein malu, suku ne’ebé prontu nia bele kontinua ona,” Diretora PNDS munisípiu Baucau, informa, iha ninia knaar fatin, tersa ne’e.

Tuir Diretora, bainhira suku ne’ebé iha dokumentu kompleta hanesan prosesu aprovizionamentu, asina kontratu ho badaen, bele ona destaka matéria ba fatin konstrusaun hodi hahú atividade.

“Iha postu Venilale sira hahú ona, iha suku ualu fondasi ramata ona,” Amélia akresenta.

Enkuantu iha suku Triloka, tama ona iha faze monta ai-rin hafoin finaliza fondasi, ne’ebé tuir alvu, Uma Kbiit Laek iha suku ne’e ho durasaun serbisu fulan-ida resin.

“Uma tolu iha suku Triloka hahú daudaun konstrusaun. Hanesan horseik ami vizita suku ne’e, nia progresu fíziku la’o di’ak. Ami dezafia badaen sira ramata sedu no sira disponbiliza, kleur liu finaliza iha fulan-ida resin,” nia hatutan.

PNDS lansa ona Uma Kbiit Laek iha munisípiu Baucau, iha aldeia Aubaka, suku Triloka, postu Baucau Villa, iha loron 01 jullu, ne’ebé benefísiariu hamutuk na’in-tolu, kompostu hosi Mateus da Costa, Herminia da Silva no Franquelino Nawa, ho medida uma 48m², ho totál orsamentu kada uma $17.000.

Orsamentu ba programa ne’e iha tinan 2021 hamutuk millaun $3,2, ho totál benefísiariu hamutuk 177 iha 59 suku, Baucau.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here