Reitór UNTL, João Soares Martins, akompaña hosi dekanu FMSS ko’a fita hodi inaugura edifísiu foun FMSS iha Caicoli, Dili, tersa (06/07). Imajen Tatoli/Francisco Sony

DILI, 06 jullu 2021 (TATOLI)– Edifísiu foun elegante ho andár tolu (3) ba Fakuldade Medisina Siénsia Saúde (FMSS), Universidade Nasionál Timor Lorosa’e (UNTL) ne’ebé tersa ne’e foin inaugura, lori ona dezentendimentu iha uma-laran UNTL nian.

Notísia Relevante : MESSK inaugura edifísiu foun Fakuldade Medisina UNTL

Vise-Dekanu asuntu Administrasaun no Finansas, Fakuldade Siénsia Sosiál (FSS),  Julio Aparício, hamutuk ho Dekanu (FSS) no estudante-sira FSS nian sei hamriik halo boikota ba atividade ensinu aprendizajen FMSS nian bainhira edifísiu foun FMSS ho aula 18 la fó balun ba FSS atu utiliza.

“Ha’u ho dekanu rasik mak orienta estudante-sira halo asaun protesta hasoru estrutura UNTL tanba edifísiu foun FMSS ne’ebé inaugura ona, harii iha arredores FSS nian, maibé ami la hetan direitu uitoan bá edifísiu ne’e,” Julio Aparício, afirma iha ámbitu serimónia inaugurasaun edifísiu foun FMSS ne’ebé hala’o hosi Ministru Ensinu Superiór, Siénsia no Kultura (MESSK), Longuinhos dos Santos, ho Magnífiku Reitór UNTL, João Soares Martins.

Asaun Vise-Dekanu ne’e nian hanesan espresaun protesta atu Reitór UNTL bele buka solusaun. Nune’e, edifísiu ne’ebé harii ho osan Estadu $678.000 iha arredores FSS nian ne’e bele utiliza aula ualu (8) ba estudante-sira FSS nian.

Molok ne’e, Dekanu ho Vise-Dekanu FSS nian submete ona karta ba Reitór UNTL atu bele entrega aula ualu ka 10 hosi edifísiu foun FMSS nian ne’e ba FSS, maibé to’o de’it serimónia inaugurasaun ne’e seidauk hetan resposta hosi Reitór-rasik.

“Área ne’e ami nian, uluk FMSS laiha fatin, ami mak oferese fatin bá sira. Signifika universidade konsidera kampus Caicoli ne’e ami nian. tanbasá maka universidade deside harii edifísiu foun ida ho andár tolu bá MSS iha ami nia área sein konsidera ami na’in bá área ne’e,” Julio Aparício hateten.

Nia fó ultimatu katak sira halo esforsa aproximasaun ho dekanu FMSS atu buka solusaun. Maibé, bainhira laiha solusaun, maka nia sei organiza estudante-sira FSS foti medida taka portaun kampus atu laiha atividade hodi hein universidade bele buka solusaun bá kauza ne’e.

Hatán ba reklamasaun ne’e,  Magnífiku Reitór, João Soares Martins, sei buka tempu atu bolu dekanu hosi parte rua; FSS ho FMSS atu rezolve polémika ho edifísiu foun ne’e.

Reitór João Soares Martins husu bá dekanu FMSS atu bele jere edifísiu foun ne’e tuir oráriu ne’ebé iha hodi fó oportunidade bá FSS bele utiliza sala aula balun.

“Ha’u hakarak hateten bá ita boot-sira, edifísiu foun FMSS nia na’in maka UNTL. Ha’u husu bá dekanu FMSS atu fó mós oportunidade bá fakuldade seluk atu utiliza espasu balun iha edifísiu ne’e,” João Martins hateten.

Nia konsidera asaun protesta ne’ebé halo hosi Senadu FSS tanba la satisfás ho desizaun universidade nian hodi harii edifísiu foun bá FMSS. Maibé nia rasik sei buka solusaun di’ak atu hasoru-malu ho dekanu na’in rua hodi diskute asuntu ne’e.

“Ha’u la promote maibé ha’u sei bolu dekanu na’in-rua atu ko’alia hodi buka solusaun bá asaun insatisfasaun ne’ebé akontese depois serimónia inaugurasaun edifísiu foun FMSS ne’e,” João Martins tenik.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here