Konstrusaun UKL ba abitante Palino Quintão de Jesus, iha suku Lui Olu, postu administrativu Watucarbau ne’ebé paradu hela, tanba estrada aat no transportasaun materiál konstrusaun paradu. Imajen Tatoli/Vitorino Lopes da Costa.

VIQUEQUE, 02 jullu 2021 (TATOLI)—Tuir planu hosi Programa Nasionál Dezenvolvimentu Suku (PNDS), Munisípiu Viqueque, katak benefisiáriu ba programa Uma Kbiit Laek (UKL) 2021, sei konstrui uluk iha suku Dilór postu administrativu Lacluta, no suku tolu seluk enkaixa ba pakote 2022.

“Konstrusaun UKL iha postu administrativu Lacluta ita sei halo uluk iha suku Dilór, suku tolu ita seidauk bele halo tanba estrada sei aat no difikulta transportasun materiál konstrusaun,” Diretór PNDS munisípiu Viqueque, Estevão de Carvalho, hateten ba jornalista Agência Tatoli, iha edifísiu adiministrasaun munisípiu Viqueque, sesta ne’e.

Notísia relevante:Governu hahú konstrui uma kbiit laek iha Bobonaro

Kona-bá ne’e, administradór postu administrativu Lacluta, José de Andrade do Santos, rekoñese katak, kondisaun estrada liga ba suku tolu aat no ponte mós kotu, nune’e seidauk bele tama prioridade iha 2021.

“Ami-nia estrada liga ba suku tolu ne’e kondisaun la di’ak, tanba ponte mós kotu. Tanba ne’e ami mós hein nafatin Ministériu kompetente atu tau mós prioridade ba estrada rurál,” José de Andrade do Santos hateten via telefónika.

Postu adiministrativu Lacluta iha suku haat (4), mak hanesan suku Ahic, Laline no Uma Tolu Dilór.

Konstrusaun UKL Lui Olu paradu

Konstrusaun UKL ba abitante Palino Quintão de Jesus iha suku Lui Olu, postu administrativu Watucarbau, ne’ebé lansa fatuk dahuluk hosi Ministru Adiministrasaun Estatál (MAE), Miguel Pereira iha 22 Juñu 2021, to’o oras ne’e paradu tanba kondisaun estrada ne’ebé la permite atu transporta materiál konstrusaun.

“Ita sei haree kondisaun klimátika, bainhira udan para ona mak ekipa PNDS ho ekipa suku foin halo konstrusaun,” Diretór PNDS munisípiu Viqueque, Estevão de Carvalho hateten.

Estevão de Carvalho, dehan oras ne’e daudaun estrada la di’ak duni tanba tahu makaas no transporte públiku no privada seidauk bele movimentu.

Tinan ne’e, munisípiu Viqueque sai benefisiáriu ba programa UKL ho totál hamutuk 108 iha postu administrativu lima mak hanesan Lacluta uma 12, Ossu uma 30, Uatulari uma 18, Uatukarbau uma 18 no postu administrativu Viqueque Vila uma 30.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here